Lamok-lamok  sa MCWD

Inay mahapsay ang kagubot ug matutokan na unta ang dakong problema sa kakuwang sa supply sa tubig dinhi sa Metro Cebu human migawas ang opinyon sa Office of the Government Counsel labot sa katungod sa Local Water Utilities Administration (LWUA) pag-interbenir sa operasyon sa mga water district sama sa Metro Cebu Water District (MCWD) misamot hinuon ang kaguliyang.

Inay nga ang away sa panag-ilog sa liderato sa MCWD tali ra unta nilang chairman Joey Daluz ug Mayor Michael Rama karon nahimo nang lamok-lamok tungod sa pagsalmot sa LWUA nga maoy hinungdan sa pag-interbenir pud ni Gobernador Gwendolyn Garcia aron kaprotehian ang interest sa mga konsumidor sa tubig sa lalawigan. Nisamot ang kaguliyang diha sa MCWD tungod sa pagpamugos sa LWUA nga mo take over sa operasyon sa water district.

Ang kampo ni Daluz nagmagahi pagtugyan sa liderato sa MCWD ngadto sa LWUA tungod kay alang nila wa ni igong basihanan.

Giduso ang isyu didto sa buhatan sa OGC aron unta mahatagan og husay ang kontrobersiya apan inay mahilot misamot hinuon ang kaguliyang. Matud sa OGC dunay gahom ang LWUA nga motake over sa water district apan ang maong gahom dunay limitasyon.

Mahimo lang ang LWUA nga motake over kun di kabayad ang water district sa iyang loan. Apan matud sa MCWD wa silay paltos sa pagbayad sa ilang utang busa di magamit sa LWUA iyang gahom pag-take over.

Apan lahi ang argumento sa LWUA. Matud nila nga di lang limitado sa kapaltos pagbayad sa utang ang gipasabot sa OGC nga default kun dili apil sab ang ubang palpak sama sa wala masulbad nga problema sa non-revenue water o ang mga tubig nga nausik gumikan sa guba nga mga tubo.

Kun imong basahon og tarong ang opinyon sa OGC tataw nga ang default nga gihisgutan niini mao lang ang mahitungod sa loan o utang. Wala malakip sa gihisgutan sa OGC ang taas nga non-revenue water sa MCWD.

Sa laktud gipamugos sa LWUA ang iyang gahom bisan dili pa angayan nga gamiton. Ug nisihag ang motibo sa LWUA atol sa nahitabong standoff niadtong Lunes tungod kay naklaro nga nakigkumbuya sila sa kampo ni Rama.

Ang presensiya nilang City Administrator Collin Rosell ug Atty. Jerone Castillo ug ubang abogado sa City Hall didto sa MCWD aron pugson pagpalingkod si Atty. Dx Lapid isip acting general manager maoy tataw nga ebidensiya sa panagkumboya sa LWUA ug City Hall.

Apan saludo ko sa kanhi broadcaster nga si Lapid tungod kay nakamatikod siya dayon nga gihimo ra siyang piyon sa politika hinungdan nga dali siyang miluwat sa gisangon nga katungdanan isip OIC general manager sa MCWD.

Ug salamat sa pagpakabana sa gobernador nabalik dayon sa normal ang sitwasyon sa operasyon sa MCWD bisan ang dakong kakuwangan sa supply sa tubig nagpabilin pang dakong hagit sa pagkakaron taliwa sa nagpadayong huwaw.

Hinaot motuhop sa kasing-kasing sa mga opisyal sa LWUA ug City Hall nga di karon maoy hustong panahon sa ilang ambisyon ug kapritso.