Ang mga konsumidor ang nabuthan

Kini ang nahitabo karon sa nagpadayon nga kagulyang sa Metro Cebu Water District kon MCWD tungod sa panag ilog karon kong kinsa man gyud ang gamhanan, patas-anay gyud sa ihi diin mura na og fruit salad nga napan-os ang isyu nga naglimin sa isyu.

Nisamot pa karon nga nanghilabot ang Local Water Utility Administration nga ni-takeover sa MCWD nga higpit gialkontra sa kasamtangan nga mga opisyal sa MCWD kay lagi walay basehan ang gihimo sa LWUA.

Nisamot karon kalubog ang isyu human nanginlabot ang lokal nga kagamhanan sa dakbayan sa Sugbo kinsa gitumbok nga nagpasira sa main office sa MCWD diin gipabarikadahan gani ang mga karsada nga padung sa edipisyo hinungdan nga wala gyud matigayon ang mga transaksyon sa mga yanong konsumidor kay lagi sirado man.

Nanginlabot na usab ang kapitolyo sa nahitabo karon sa MCWD, kauban ang mga mayor sa mga LGU nga giserbisyohan sa MCWD ug mga opisyal sa Provincial Board nagkahiusa sila sa paghatag sa ilang suporta sa kasamtangan nga mga opisyal sa MCWD ug gikondenar usab nila ang pagpanghilabot sa LWUA nga mibutang og mga interim board of directors.

Labaw sa tanan gihimug-atan nila ang pagpatigbabaw sa rule of law nga mao usay gipangangkon sa LWUA nga balaod pud kuno ang ilang gibasehan sa pag takeover sa operasyon sa MCWD, ingon usab niini ang claim sa Cebu City LGU nga nagtamod usab sila sa balaod.

Pulos sila adunay background o experto sa balaod ug managsama sila sa gitamdan apan managlahi ang ilang mga interpretasyon nga ang mga yanong lungsoranon walay pakialam basta ang importante maserbisyohan lang, tubig ang ang gikinahanglan ilabi na niining panahona nga nakasinati og krisis sa tubig.

Hangtud asa ug hangtud kanus-a molanat ang krisis dili sa tubig kon dili krisis sa inilogay sa gahum sa MCWD? Ang makatubag niini sila ra gyud.

Kong aduna may mga gikinahanglan nga susihon ang LWUA sa mga kasamtangang opisyal sa MCWD unta iangan angan lang nila dili nila itunong karon nga dakong krisis ang nasinati sa tubig kay nasamotan gyud ang gibati nga kalisdanan sa mga yanong tawo.