Taphaw nga imbestigasyon
Ang Department of Environment and Natural Resources (DENR) mao ang labing una nga nitingog human nag-viral sa social media ang pagka-gusbat sa Chocolate Hills sa Bohol tungod sa Captain's Peak Resort. Sila sab ang labing sad-an sa eskandalo:
• Ilang ahensiya, ang Protected Area Management Board (PAMB) ang nihatag sa unang pagtugot sa resort sa 2018 nga gidasonan sa ikaduha nilang pagtugot sa 2022; ug
• Dihang nabisto ang kontrobersiya sa Agosto 2023 (pinaagi sa The Freeman ug Bohol Chronicle), giluwatan nila ang closure order sa Septiyembre 2023 nga sila ray nahibawo.
* * *
Ang mga sayop sa DENR mao ang gibasol sa lokal nga mga opisyal sa Bohol sa ilang paglingiw sa kalapasan sa resort:
• Ang permiso sa PAMB maoy nakaaghat sa munisipyo sa Sagbayan sa pagluwat og building ug business permits ug sa Kapitolyo sa Bohol sa paghunong sa ilang pasiunang imbestigasyon sa kalapasan niadtong 2018; ug
• Ang sekreto nga DENR closure order maoy lusot sa Kapitolyo ug munisipyo sa pagtugot sa pagpadayon sa operasyon sa resort hangtod sa pagpanira ini niadtong Huwebes, unom ka buwan human luwati ang closure order.
* * *
Di hinuong makapanghunaw og responsibilidad ang lokal nga mga opisyal:
• Ang barangay kapitan sa Canmano, George Bonajos Sr., ug mayor sa Sagbayan, Restituto Suarez III, ang gipasanginlan nga nikagis sa duha ka Chocolate Hills para sa access road sa resort nga wa mokuha sa pagtugot sa PAMB; ug
• Silang Gobernador Aris Aumentado ug kaubanan sa Kapitolyo mora og pahoy nga way gihimo dihang giisnab sa DENR ang resulta sa ikaduha nilang imbestigasyon sa kalapasan sa Agosto 2023.
* * *
Nahibawo na tang daan unsay mahitabo sa buwag nga mga imbestigasyon sa House of Representatives ug sa Senado:
• Labing masabonan ang mga opisyal sa DENR Central Visayas nga gipangulohan ni Regional Execute Director Paquito Melicor Jr.;
• Ang kagrabe sa kasaba batok sa mga opisyal sa Bohol mag-agad unsay politikanhong partido sa mga mangutana ug mga pangutan-on; ug
• Ang Chocolate Hills ug ubang protected areas sa Bohol, Sugbo ug ubang bahin sa nasud makaangkon sa abunda nga mga pasidungog, mas nagbaha nga mga pasalig, pipila ka balaudnon ug labihan kanihit nga, nakatag-an ka, aktuwal nga proteksiyon.
* * *
- Latest
