Bugasan sa mga kawatan

Samtang nagkaboang ang kagamhanan sa lalawigan sa Sugbo og panghangyo sa National Food Authority nga mopalit og baratong bugas alang sa mga programa niini para sa mga kabus, nabulgar ang dakong anomaliya sa nahisgutang ahensiya nga miresulta sa pagkasuspenso sa 140 ka mga opisyal niini lakip.

Ang lalawigan sa Sugbo nagtinguha unta nga mopalit og baratong bugas gikan sa NFA aron ibaligya ngadto sa mga kabus pinaagi sa Sugbo Merkadong Barato Program diin ang mga kabus mahimong mopalit og bugas sa presyo nga subsidized sa Kapitolyo.

Ang kabahin sa mapalit nga bugas sa Kapitolyo gikan sa NFA gamiton sab unta sa lalawigan alang sa feeding program diha sa mga pampublikong tunghaan. Apan nagdumuli na ang NFA pagbaligya og bugas ngadto sa probinsiya tungod sa mando sa administrator nga si Roderico Bioco.

Samtang wala mobaligya ang NFA og bugas ngadto sa Kapitolyo sa Sugbo nadiskobrehan sa nagpadayong imbistigasyon ang  dakong anomaliya sa pagpamaligya sa ahensiya sa supply sa bugas.

Natribukar nga dunay posibling panagkonsabo sa mga dagkong opisyal sa ahensiya aron ibaligya ang buffer stock sa bugas sa nasud sa barato nga presyo ngadto sa gipaboran nilang mga negosyante.

Gawas nga kwestiyonable ang presyo sa pagbaligya sa NFA nasuta nga wa sab ni mosubay sa hustong proseso sama sa bidding ug way pagtugot gikan sa NFA Council. Niburot sa ginansiya ang gipaburan nilang mga rice traders tungod kay ang ilang palit P25 ang kilo ug ang ilang baligya sa merkado P70 ang kilo.

Ubos sa Rice Tariffication Act, ang NFA gimanduan pagpundo og suplay sa bugas alang sa panginahanglan sa nasud panahon sa katalagman. Gimanduan ni nga magbaton og dili mo minus 300,000 metric tons nga buffer stock nga anha paliton sa mga local farmers.

Ang samang balaod nagtugot sa NFA nga makabaligya og supply aron malikayan ang pagkadaot sa stocks. Apan inay adto ibaligya sa mga ahensiya sa gobyerno nga nagkinahanglan sama sa lalawigan sa Sugbo, ang NFA didto hinuon kini namaligya sa pribadong mga negosyante sa presyo nga alkansi ang gobyerno.

Tingali panahon na bungkagon ang maong ahensiya ug ihatag ang trabaho niini ngadto sa Department of Agriculture. Dugay na nga gihimong bugasan sa mga kawatan sa gobyerno ang nahisgutang ahensiya.

Niadtong gitugotan pa sila nga makahimo og importasyon og bugas gihimo sab nilang negosyo ang minimum access volume. Gipamaligya nila ang MAV ngadto sa mga importer samtang ang uban gi-recycle.