Bag-ong gikasal gikawata’g  P100mil

CEBU, Philippines — Sa police station diretso inay sa honeymoon ang magtiayon nga bag-o lang gyud gikasal human nga gikawat ang P100,000 nga kwarta nga gibutang nila sa U-box sa ilang motor nga gi-park gawas sa simbahan sa Barangay Poblacion 2, Lungsod sa Malabuyoc, Huwebes sa buntag, Marso 7, 2024.

Sa report sa Malabuyoc Police Station ang biktima sa pagpangawat mao si alyas Rey, tag-iya sa motor, 29 anyos, usa ka negosyante ug residente sa Barangay Montañeza sakop ra usab sa maong lungsod.

Nasayran nga pasado ala-1 sa hapon sa adlaw’ng Huwebes ang biktima miadto sa police station ug mi-report nga ang iyang kwarta nagkantidad og P100,000 nga gibutang sa Ubox sa motor nga Honda Click nawala.

Niadtong Huwebes sayo sa buntag nagpakasal kini ug sa iyahang hinigugma. Alas- 5:30 palang sayo  sa buntag niabot ang groom sa simbahan luwan sa iyang motor ug gi-park kini sa gawas sa simbahan ug kompiyansa ra kini nga ang kwarta adto ra gibutang sa U-box sa motor.

Pagkahuman sa seremonyas sa kasal migawas sila sa simbahan apan sa pagsusi sa biktima sa U-box wala na didto matod pa ang kwarta.

Naa unta’y CCTV apan layo kini sa simbahan ug gawas niini ang nahimutangan sa motor sa biktima nasalipdan og dako nga punoan sa mahogany.

Giingong giukang ra ang kilid sa motor hinungdan nga naabli kini.  Ang kwarta nga gikuha gamiton unta para sa negosyo ug ubang personal nga gamit sa biktima.

Sa pagkakaron dili pa kasulti ang kapulisan kung pila ka tawo ang kawatan.

“Naay CCTV diri sa highway layo-layo na sa simbahan unya ang motor pud niya natunong pud inig kuha sa CCTV naa pud sa luyo sa dakong kahoy sa mahogany ang motor,” sigon ni Police Senior Master Sergeant Ronidilo Duerme, imbestigador sa Malabuyoc Police Station. 

Human sa kasal, igo ra gihatod ug gipakaon ang mga bisita sa bag-ong kasal ug wala nay photo opportunity nga nahitabo sanglit nidiretso man sila sa Malabuyoc Police Station aron mo-report sa hitabo.

Wala gisalikway sa kapulisan ang posibilidad nga kaila ra sa biktima ang nagbuhat sa krimen ug padayon ang ilang pagpalawom sa imbestigasyon mahitungod sa maong insidente. --  IBM BANAT NEWS