EDITORYAL - Kawa sa politika nibukal na

Dunay dakong kausaban unya nga mahitabo sa mga alyansa sa mga lokal nga mga kandidato sa ilang tagsa-tagsa ka lokal nga politikanhong partido karong umaabot nga mid-term elections sa sunod tuig 2025.

Karon palang daan nibukal na ang kawa sa politika sa Cebu City ug daw dunay mga managkapartido nga magkabuwag-buwag sa sunod nga eleksyon.

Partikular nga maglanog-lanog karon kining mga nakitang guna sa bugkos sa alyansa sa Barug Sugbu ubos sa pamunoan karon ni Cebu City Mayor Michael Rama ug kang Bise Mayor Raymond Alvin Garcia nga partido sa amahan sa naulahi nga Partido Kusog (Kusog, Uswag, Sugbu), kanhi mayor Alvin Garcia.

Ang Partido Barug gilangkuban og mga loyal ug mga karaang miyembro sa kaniadto Team Rama ug sa Partido Kusog (Kugi, Uswag, Sugbu)  ni kanhi mayor Alvin Garcia, ang iyang anak mao karon si Cebu City Vice Mayor Raymond Alvin Garcia.

Angay dili kalimtan sa mga konstituwente karon sa Cebu City nga ang kadaghanan sa mga sakop sa Barug ug Team Rama gikan kaniadto sa kasamtangan karong oposisyon nga Bando Osmeña Pundok Kauswagan (BOPK) diin pirmeng mag-tandem silang Rama ug si kanhi mayor Tomas Osmeña.

Sama sa Kusug, si kanhi mayor Alvin Garcia sakop sab sa BOPK, gani nahimo siyang bise mayor ni Osmeña kaniadto apan sa pagdagan sa mga panahon nagkabuwag sab ang duha sama ra sab sa nahitabo kanila ni Rama.

Dili na ikahibulong kun sa sunod nga eleksyon, mosungag ang batan-ong Garcia kang Rama, nabalik lang ang kasaysayan sa politika sa siyudad.

Mao sab unya ang mahitabo sa mga konsehal sa siyudad, magbalhin-balhin sab sa ilang dapigan tungod kay kinahanglang buhaton kun gusto silang modaog ug matagad.

Si Osmeña sa iyang bahin, mipahibalo ng daan nga moapil sab sa bugnong lugaynon karong 2025 apan modagan siya isip bise mayor ug iyang gituboy ang kaniadto pa niya kaalyado nga si konsehal Noel Archival, kana kun mosugot ang nauwahi.

Sa laktod, balik-balik lang ug pare-parehas lang nga mga tawo ang nagpuli-puli sa renda sa siyudad. Naa na unya sa mga tawo ang pagpili kun kinsay angayan hatagan og mandato.