Gikalimtan pagtuyo
Daghan kaayo kanato nga kon nag-atubang gani og dakong problema, magluhod-luhod dayon atubangan ni Señor Santo Niño, ug sa ubang mga santos kay mangayo’g tabang.
Ang uban mosaad og mga panaad nga kon imong hinuktokan, dakong sakripisyo alang kanila, aron lang gyud makumbinser ang Ginoo paghatag sa ilang gipangayong tabang.
Apan kon masulbad na gani ang ilang problema, mahikalimot na sa ilang mga gisaad. Bisan gani ang pagbisita ni Santo Niño atol sa gitawag og “Fiesta Señor,” dili na mohimo.
Tambag nako ninyo, sa dili pa kamo maglingaw-lingaw pagtan-aw sa mga contingents sa Sinulog Grand Parade ugmang adlawa, simba usa ug bisitahi si Señor Santo Niño.
* * *
Duna ko’y nabasahan, ug tuguti ko nga akong i-share kaninyo. Gikan kini sa Bisayang Layko Katoliko.
Dunay nangutana : No. 1) Bro mabasa ba ang word Sto. Niño sa Bibliya ? No. 2) Di ba bro ang meaning sa Niño kay Bata man? Nganong Señor Santo Niño man? Angay unta Junior Santo Niño kay Bata man? Naa ba diay Bata nga Señor?
Tubag: Ang pulong nga "Santo Niño" Spanish word na siya. Dili English, o bisaya, o tagalog. Mabasa nato ang word "Santo Niño" sa Spanish nga Bibliya. Kon sa English nga Bibliya pa, ang Santo Niño," Holy Child na siya, Sa Binisaya nga Bibliya "Balaan nga Bata.”
Ikaduha: Ang terminong "Señor" nga gigamit sa Señor Santo Niño dili susama sa English nga "Senior" nga ang meaning "Older in age," ang "Junior" meaning "Younger in age.”
Managlahi kini nga mga pinulungan og kahulogan. Ang "Señor" nga pulong dili English, kondili "Spanish" which is Spanish definition nagkahulugan kini nga "GINOO" or "LORD." Dili susama sa atong nasabtan nga "Senior" nga kon sa English pa, “Older in age.”
Nagpasabot nga husto ang gigamit nga mga pulong "Señor Santo Niño" kay ang bata (Niño) nga nagpakatawo.
Señor meaning Ginoo, Santo meaning Balaan, Niño meaning Bata. Kay ang Bata nga nagpakatawo nga mao si Hesu Cristo, Ginoo man og Balaan, mao nga gitawag siya nga "Señor Santo Niño.”
* * *
Karon, nasabtan na nato nga ang Santo Niño nga atong giyukboan, ug nga miluwas sa akong kinabuhi dihang naligsan ko og Prime Mover didto sa Catmon niadtong Hunyo 25, 1995, mao diay si Ginoong Hesukristo sa iya pa nga pagkabata.
Mao kana nga kaniadtong miaging semana, ang procession sa imahen ni Señor Santo Niño gikan sa Fuente Osmeña paingon sa Basilica, gitawag og Walk with Jesus.
- Latest
