Luoya tawon

Kaluoy tawon sa mga kawani sa Cebu City government nga natagbaw pagpanglimpyo sa kasapaan nga gipanguhaan nila og mga basura, apan dantan og pila ka adlaw, naa na pud.

Maguol gyud ko nga magtan-aw sa hulagway sa mga kawani sa City Hall nga moubog tawon sa hugaw kaayong tubig sa kasapaan aron manguha sa mga basura.

Kon mao man gani kini ang batasan sa mga tawo dinhi sa Dakbayan sa Sugbo, makuli gyud nga makab-ot ang gipangandoy ni Mayor Michael Rama nga ang Cebu City mahimo nga susama sa Singapore.

Usahay makahunahuna ko nga mas maayo tingali nga pahamtangan na gyud og bug-at nga silot kadtong mga tawo nga masakpang manglabay og basura sa kasapaan.

Lisud gyud hinuon kaayo nga masakpan kining mga tawhana kay ang uban kanila, sa gabii manglabay sa ilang mga sagbot sa kasapaan.

Kadto tingaling mga buotang lumolupyo, itug-an ninyo sa kadagkoan sa inyong barangay kining mga tawo nga manglabay sa ilang mga basura sa sapa.

Unya, kamo sab nga mga opisyal sa barangay, ilabi na kadtong mga bag-ong nakadaog, himoi ninyo og paagi nga masakpan kining mga badlongon.

* * *

Kamo sab sa Department of Engineering and Public Works (DEPW) dalia sab ninyo ang pagtabang sa mga hingtungdang opisyal aron makagahin na og budget para pagpalawom sa sapa.

Gianinaw gyud nako pag-ayo ang gitawag og Estero Parian, kanang sapa nga nagsubay sa tunga-tunga sa Colon ug Manalili Streets ug mosangko sa Pier 2, mabaw na gyud kaayo ug hinay na ang pag-agos sa tubig.

Unya, kon may budget na gani, siguroa sab gyud nga tinuoray ang pagpalawom sa sapa, dili kay pirmahan lang ninyo ang completion report bisan og dili tinuod.

Samtang gibutyag ni Mayor Rama nga tinud-anay ang iyang kampanya pagpangguba sa mga estraktura nga anaa sulod sa tres metros gikan sa sapa, apan ambot kanus-a kini mahuman.

Gitan-aw karon sa katawhan kon makabungkag ba ang mga sakop sa Task Force Gubat sa Baha sa estraktura nga kabahin sa mga dagkong tindahan diha sa downtown area.

Pananglit sa The Freeman/Philippine Star building, gipaguba na nila ang kural nga anaa sa tampi sa Estero de Parian, apan ang estraktura nga anaa ra sa atbang, wa pa gyud maguba.

Ang laing estraktura nga nagbaligya og mga plastic products sa unahan sa The Freeman, igo lang moingon ang mga empliyado kon anhaon sa mga kawani sa City Hall nga wa ang ilang agawon.

Aw, kon magmagahi mo, tan-awon nato kon mahatagan ba mo og business permit sa sunod tuig.