Dawata ang resulta

Humana ang Barangay ug Sagguniang Kabataan Elections kagahapon ug nahibaw-an na ang mga mananaug sa nahisgotang piniliay apan ang kasakit sa pagkaparot magpabilin sulod sa pipila ka adlaw alang niadtong andam sa ilang kaugalingon sa pagdawat sa resulta sa piniliay ug sa dayon niadtong dili gusto nga modawat sa ilang kaparotan.

Daghan ang rason nganong adunay mga kandidato nga dili makadawat sa ilang kaparotan ug kini mao ang mga makaduda usab nga panghitabo panahon sa piniliay nga makapatuo nga gitikas ug nausab ang resulta sa piniliay.

Bisan kinsa dili g yud malipay nga tikasan. Mao nga angay lang pod natong sabton ang mga kandidato nga sa sinugdanan magdumili sa pagdawat sa ilang kaparotan, ilabi na kon aduna siyay ligon nga basihanan.

Hinuon ang naparot sa piniliay gihatagan sa balaud og remedyo sa pagpaabot sa iyang reklamo o pagkwestiyon sa resulta sa eleksiyon. Gituyo kini sa mga magbabalaud tungod sa kadaghang reklamo human sa piniliay. Tungod sa kadaghang reklamo mahitungod sa tikas sa piniliay ila nang giingon nga sa Pilipinas walay napildi sa piniliay, gitikasan lang.

Bisan og dunay remedy nga gitagana ang balaud alang niadtong mga nadihado sa piniliay, daghan ang dili makahimo niini tungod sa kamahal sa gasto sa pagsunod sa proseso. Tungod niini, ang uban moingon nalang nga mas maayo pang mo-hire og gun-for-hire kay sa mo-hire og abogado nga mangabogar sa iyang kaso. Ang uban magsugod nalang sa pagtigom og salapi alang napod sa sunod nga piniliay. 

Mas maayo nga dawaton nalang g yud sa mga kandidato kun unsa man ang resulta sa piniliay ug mopadayon sa iyang mga nahunahunaan nga programa nga gusto niyang himoon alang sa kaayohan sa katawhan sa iya na lamang pribado nga kapasidad kun gusto g yud siya nga motabang o makatabang.

Hinuon, mas maayo g yud kun anaa ka sa katungdanan sa gobiyerno tungod kay mas dako o mas daghan ka pa og matabangan.