Busy bisan walay gibuhat

Giduso ni Senador Mark Villar ang Senate Bill 1378 kansang tumong mao ang pagdoble sa kantidad sa Personal Economic Relief Allowance (PERA) sa mga empleyado sa gobiyerno. Sukad sa tuig 2009 pa ang kasamtangan’g P2,000.00 nga kantidad sa PERA ug dili ikalimod nga dako na ang pagsaka sa presyo sa batakang panginahanglan. Long overdue na ang maong lakang apan sige lang kay, “samtang nagpabungol-bungol ang kagamhanan sa gamitoy’ng suholan, nagpaka-aron ingnon lang usab ang mga empleyado nga busy bisan walay gibuhat”. Paleho la!

Makahahadlok ang pagbag-o

Gihimug-atan ni Presidente Bongbong Marcos ang kamahinungdanon sa mga Pilipino scientist alang sa kalambuan sa nasud busa gimandu-an niya ang DOST sa pagpalambo sa “Balik Scientist Program” ug sa paghatag og dugang mga insentibo aron madasig sila nga mobalik sa Pilipinas. Baniog kaayo ang sugilanon sa atong mga siyentipeko ug imbentor, lakip na gani mga atleta, nga modangop ug sagupon sa ubang nasud kay gipasagdan lang sa atong kagamhanan. Bantayanan pa ang maong programa kay ginaingon baya nga, “Ang labing makahahadlok nga higayon sa usa ka ngil-ad nga kagamhanan, mao ang higayon nga kini magsugod na pagbag-o”. Madahaaan!

Lutsan sa kanahan

Sumala sa datos sa DENR, maka-generate ang tinuok nasud og mokabat 7,000 ka metriko’ng tonelada nga plastic waste matag adlaw diin 20% niini, mosangpot ngadto sa kadagatan. Sa bag-o lang napasar nga “Extended Producer Responsibility Act of 2022 (R.A. 11898), gitahasan ang mga kompaniya sa pag-establisar sa giingon’g EPR programs alang sa plastic waste reduction, recovery and diversion. Daghan na ang balaod apan ang pagpatuman ug pagtuman maoy suliran. Haum ang panultihon nga, “Ang maayong katawhan wala magkinahanglan og balaod aron molihok nga responsible, apan ang kanahan nga katawhan mangita gayod og paagi aron malutsan ang balaod”. Pagkatoytoy!

Hitsura lang sa kutsara

Tuyo sa DepEd nga atimanon ang seryoso’ng suliran sa learning gaps sa kabataan tungod sa nasinati nga lock down sa panahon sa pandemya. Dugang pa sa DepEd, angayan nga kuhaan ang naghinobra’ng kurikulom ug mobalik una sa mga batakan leksyon sama sa reading ug mathematics. Mahinungdanon ang hustong kurikulom ug haum nga leksyon alang sa pagkat-on sa bata. Labot pa, angayan usab tutokan ang sistema sa pagtudlo kay ginaingon baya nga kon “spoon feeding” lang ang paagi sa pagtudlo, sa kapulihay dili leksyon ang makat- unan, kon dili ang hitura lang sa kutsara”. Fezteleern!

Oportunista batok negosyante

Gironda sa NBI ang usa ka warehouse sa Bulacan nga namaligya’g expired, napihok ug nangataya nga de-latang pagkaon. Giingon nga ang maong mga de lata gikan usab sa mga nasunog nga mga establisemento nga gidaginot aron ibaligya sa ubos-ubos na nga presyo. Nahimugso kuno ang tawo nga ma-isog, masaligon ug hakog, apan daghan kanato, sa atong pagdako, nagpabilin nga hakog. Mao kana’y giingon nga “ang mga oportunista mangita’g kahigayonan, apan ang mga negosyante, maghimo’g kahigayonan”. Fishkots