Mga pagtulon-an ni Sonny Osmeña
Sa kinapungkayan sa iyang politikanhong gahom, si anhing Senador Sonny Osmeña labihan kasuod sa administrasyon ni kanhi Presidente Joseph Estrada nga nangahas siya sa pagpasidaan sa mga Sugbuanon nga magpuasa tungod sa ilang pagbotar sa gikasungi niyang manghod nga si anhing Lito Osmeña sa eleksiyong presidensiyal sa 1998.
Pero nitug-an siya nako nga ang labing importanteng leksiyon sa politika iyang nakat-onan sa katuigan nga di niya alyado ang Malakanyang ug kontra niya ang mayoriya sa mga senador, mga kongresista, mga gobernador ug mga mayor: “Kusog gani ang hangin, hupo.”
* * *
Akong tan-aw, mao nay gihimo sa TV5 Network Inc. ug sa ABS-CBN Corporation. Way trampas ang ilang investment agreement. Wa silay balaod nga nalapas. Wa silay panginahanglan nga nataligam-an. Makaayo sa broadcast industry ang ilang transaksiyon. Pero kinahanglan sila nga mohupo.
Kay di nila alyado ang Malakanyang. Dunay pipila ka senador ug kongresista nga nisuporta sa kauyonan. Pero ang makabungog nga mayoriya nagpakahilom. Ug mahimong monunot sa kusog ug saba nga unos sa pipila ka magbabalaod nga niisip nga crime against humanity ang pagpangandoy og luna sa independente nga media.
* * *
Di taphaw nga negosyante si Manny Pangilinan. Ang pagsugot sa investment agreement nagtimaan nga di siya talawan. Ni tsuwawap sa gahom. Pero abli ang iyang mga mata. Ug duna siyay abundang pasidaan.
Mahimo ganing nitabang sa pagpukaw niya sa pait nga kamatuoran ang kadagkoan sa ABS-CBN. Kansang aplikasyon sa franchise renewal niadtong 2020 nisunod sa mga balaod ug gipaboran sa tanang ahensiya ug sa kinabag-an sa katawhan. Pero napasira sa madinumtanong presidente ug mga alyado.
* * *
Iyang abilidad pagpa-utaw-utaw sa sukwahi nga politikanhong mga bawod nakapalahutay ni anhing Sonny Osmeña og lima ka dekada. Mas taas siya og utong kay sa batan-ong mga politiko nga nagsunod niya.
Nakat-onan ang laing pagtulon-an dihang talisawop nang iyang adlaw. Nagkadungan mi og atang (drayber ug sakyanan para niya ug taxi para nako) sa lobby sa luhong hotel sa Cebu City. Kasagaran sa mga tawong nilabay nitagad nako. “Tan-awa ra gud nang mga ingrato,” tuaw niya sa lanog nga tingog, “nilamano nimo nga kutob ra og yawyaw sa radyo; ako nga nakapatukod og kaliboan ka kilometro nga kadalanan gilabyan lang!”
* * *
- Latest
