EDITORYAL - Makadaginot ba gyud kun i-postpone ang eleksyon?

Dunay mga panawagan sa pipila ka hut-ong sa Pilipinas nga iuktaba ang umaabot nga piniliay sa barangay ug Sangguniang Kabataan elections nga gikatakdang himuong karong Disyembre 5, 2022.

Ang ilang rason, aron kuno makadaginot ang gobiyerno og gibanabanang P8.5 bilyones nga pundo ug gamiton nalang kini sa pag-atiman sa problemang mugna sa pandemiya. Ang eleksyon sa Disyembre 2022 magkinahanglan og P8.44 bilyones.

Apan kinsa man ning mga nangusog niini? Mga botante ba o mga politiko ra sab nga maoy nagtinabangay atol sa nakalabay nga piniliay sa Mayo 2022?

Kun ang tinud-anay nga rason aron gyud makadaginot sa pundo ang gobiyerno, mas maayo tingaling ipadayon gyud ang eleksiyon karong tuiga ug dili na isibog pa sa ubang mga adlaw. Kini kun basihan ang pamahayag ni Comelec Chairman George Garcia atubangan sa Senado atol sa committee hearing nga sobra doble ang gikinahanglan na unyang pundo sa gobiyerno kun isibog sa sunod tuig ang maong piniliay.

Matud ni Garcia, kun isibog ang eleksiyon sa Mayo 2023 ang P8.5 bilyones mahimo ng P13.5 bilyones tungod sa dugang mugnaong mga clustered precincts kay modaghan ang botante, dugang mga balota, dugang inks, ug ingon man sweldo para sa mga moserbisyo sa eleksyon ug uban pa. Kun isibog pa gyud sa Disyembre 2023 (nga maoy gusto sa mga magbabalaod ug gikalipay sa mga incumbent barangay officials), mosamot kadako ang kinahanglanong pundo kay mahimo na unya kining P18.5 bilyones.

Ang pangutana karon? Barugan ba aning mga magbabalaod ug mga kasamtangang barangay officials ang ilang pangangkon nga rason? Nga aron makadaginot ang gobiyerno og pundo? Ang labing maapektahan raba aning umaabot nga piniliay mao ang mga opisyales sa mga barangay nga nagmika atol sa pag-igo sa pandemiya.

Sayod man silang dili na sila botaran sa ilang mga konstituwenteng nanimaan ug namahad tungod sa ilang pagkawalay-ayo nga opisyales.

Apan kun ugaling ioktaba gyud gihapon sa mga naa sa Kongreso ang piniliay bisan sa presentasyon ni Garcia, dili unta  tungod kay bayad kini sa utang kabubut-on ngadto sa barangay officials nga nitabang kanila niadtong panahon sa kampanya sa nakalabay nga eleksyon. Motan-aw baya ang mga Pilipino og utang kabubot-on.