Nganong wa pa kaagi sa taytayan
Bisan sa katuigan na sa paghigwaos, wa pa kong kaagi sa taytayan nga nagsumpay sa Cebu City ug Cordova tungod sa mosunod nga nagkataas nga kutay sa mga rason nga nakapabugnaw nako:
• Una, nasaag maong nalangay mi sa pagpataod sa RFID sticker kay gawas nga ngiob wa pa gyoy klarong signage ang basement parking sa shopping mall nga ilang gipili para sa rehistrasyon sa mga sakyanan;
• Ikaduha, nahugno ko dihang giablihan ang taytayan nga wa dayon magamit ang RFID sticker kay, bisan sa pangangkon nga world class sila nga kompaniya, wa maandam ang electronic toll collection system nga igo rang gikopya gikan sa uban nilang mga proyekto;
* * *
• Ikatulo, nitalaw ko sa kalbaryo sa mga nakauna pag-agi nga natanggong og pila ka oras sa apiki nga agianan sa Cordova;
• Ikaupat, nahimangod ko nga dihang naandam nang app para sa online toll payment gipatongan nila og dako nga administrative fee nga unta sila may makadaginot kon di na kinahanglan ang daghang physical toll booths;
* * *
• Ikalima, nibalibad ko dihang nanghagad ang akong asawa nga mosuway mi og agi sa taytayan atol sa usa sa among mga biyahe sa Mactan nga duol na lang kaayo sa Cordova kay ang bag-ong kan-anan nga amo untang suwayan sa South Road Properties sa Cebu City gihulagway sa among mga kaila nga lami, mahal ug abog (kay gitrabaho pa ang ubang bahin sa building);
• Ikaunom, nabawo ang sabot sa among mga higala nga manukad mi sa SRP sa pag-agi sa taytayan aron mangaon sa lamian nga barbecue sa Lapu-Lapu City kay puwerteng hubaga sa akong tuhod human sa usa ka semana nga way hunong nga lanlan sa atay ug batikun sa manok;
* * *
• Ikapito, nakanselar ang lain namong sabot nga sa bag-ong taytayan mi moagi sa pag-adto sa suki nga baratong tahianan og mga sinina sa Cordova kay ang mokuyog unta namo nga suod nga higala sa akong asawa nagpositibo sa Covid-19; ug
• Ikawalo, naapil ang pag-agi sa taytayan sa di importanteng mga lakaw nga amo lang unang gilangay tungod sa pagsugod na sab og sulbong sa bag-ong mga kaso sa Covid-19 gikan sa pagkatap sa mas mananakod nga BA.5 subvariant sa Omicron.
* * *
- Latest
