Lingi sa kagahapon

Dili ikalimod nga usahay ang mga pagmahay maoy mokuyanap sa atong kaugalingong hunahuna nga tungod niini buot natong tul-iron ang bisan unsang sayop nga atong nahimo. Buot kitang mamawi niini mao nga sa atong pagbalik sa dapit diin kita nahilambigit kaniadto buot natong ipahigmata sa nisunod kanato nga duna kitay nahimo.

Ang nakapait niini mao nga ang bisan unsang mahimong kalamboan mahimong babagan gumikan sa sentimentalism nga nahuptan nato. Unsaon daghan man kita og napondar nga alang kanato mahinungdanon ug kinahanglanon kaayo apan dili alang sa mga tawo nga gialagaran kondili alang sa pagtubos sa kaugalingon nga natun-as ug nabag-as gumikan usab sa atong pagkamapasagaron.

Usahay nahimong uhaw kita kanunay sa pasidungog. Ang maong pasidungog maoy nihimo kanatong ulipon niya nga bisan unsa na lang ang atong himoon aron makit-an sa kadaghanan nga duna gyud kitay namugna bisan pa man kon kadto bunga lamang sa atong hinubog nga hukom.

Ang mga tawo nga kanunay naglingi ug nahilasang sa kagahapon mao kadtong mga tawo nga wala pa gyud intawon maka-move on alang sa kasamtangan. Kining maong sanglitanan maoy niut-ot sa matag usa kanato aron modaginot sa mga binatang mga komentaryo kanila kang kansang pangedaron hamtong na tuod apan ang pagbati daw bata nga bag-o pa lamang nalutas. Angkonon ko nga dili man tuod ingon ana ka hingkod ang baruganan ko matag karon ug unya. Apan nahimong kabahin sa akong sistema nga dinhi sa kalibotan ang tanan lumalabay laman. Bisan gani ang imong gikasalo og kaon ug nihatag sa ilang mapahiyumong pagtimbaya apan luyo sa maong pagtakuban anaa ang malaw-ay nga mga hunahuna. Ang mahinungdanon mao nga molihok sa hilom ug sa maong paglihok pakigduyog kanila nga sama nimo dunay susamang panghunahuna. Hinumdomi “OLD IS NOT ALWAYS GOLD!”