EDITORYAL - Pagsabot sa idolohiya

Makasubo nga duna na say laing batan-on ang nakalas tungod sa pakigbisog dala sa idolohiyang ilang gituohang husto. Apan kanus-a ba nahimong sayop ang usa ka idolohiyang gitamdan sa usa ka tawo?

Niadtong Nobiyembre 28 ning tuiga, napatay sa engkwentro tali sa Philippine Army Special Forces ug grupo sa mga rebeldeng sakop sa New Peoples Army si Jevilyn Campos Cullamat.didto sa Brgy. San Isidro, Marihatag, Surigao del Sur. Si Cullamat dili ordinaryong batan-ong Pilipino tungod kay anak siya ni Bayan Muna Representative Eufemia Campos Cullamat.

Ang iyang inahan sa report sa gmanetwork.com miingon nga nagtuo siyang naa na sa hustong edad ang 22-anyos niyang anak paghimo og desisyon kun unsa nga pakigbisog ang iyang gipili.

Aning bahina, ang publiko nalay maghukom kun uyon ba sila o dili uyon sa pamahayag sa magbabalaod. Apan iyaha kining katungod isip inahan.

Apan di mahimong basulon ang militar tungod kay ilang tahas nga panalipdan ang katawhan gikan sa mga kaaway ug sa mga krimen subay sa balaod.

Si Defense Secretary Delfin Lorenzana miingon nga ang nahitabo sa anak n Cullamat lig-on nga basehan sa ilang mga pagdudang gisuportahan sa Makabayan bloc diha sa Ubos Balay Balauranan ang mga rebeldeng komunistang NPA.

Apan kini hugtanong gihimakak sa kadaghanan sa maong mga magbabalaod.

Dinhi sa Pilipinas, angay masayran sa tanan nga dili na matawag nga kalapasan sa balaod o krimen kun ang usa ka indibidwal komunista o nagtamod sa idolohiyang komunismo. Apan kun sila aktibong niapil o nagpaluyo sa mga armadong kalihokan nga nakiggubat sa pwersa sa gobiyerno ug naghimo og mga krimen sa komunidad, anha na kini matawag nga krimen.

Ang idolohiya namugna gikan sa ideya. Kun sa politika kini gamiton sa usa ka indibidwal o pundok kasagaran gusto nilang usbon ang sosyodad sama sa pagusab sa naestablisar na nga naandan sa mas kinabag-an.

Apan estranghero sa Pilipinas ang idolohiyang gipakigbisogan sa mga rebeldeng komunista.

Daghan ang wala mouyon kanila ilabi na sa mga dapit nga malambuon. Kini tungod kay walay panahon ang mga tawo sa politika kondili ang batakang panginahanglan sa inadlaw-adlaw nga mao gyud untay mas angayng unahon.