Pasidaan sa inanayng pag-ulipon
Nangahas kog hubad sa kabahin sa bag-ong pastoral letter sa Catholic Bishops Conference of the Philippines (CBCP):
Maglisod pa mi pagtuo sa pagpanglaktod sa Kongreso pagpasar sa Anti-Terror Bill samtang gihamok ang nasud sa Covid-19. Wa sila magtagad sa pagsupak sa katawhan nga ilang girepresentahan. Ang sugo gikan sa itaas gipalabi kay sa awhag gikan sa ubos. Nipasamot sa kahanap sa badlis nga nag-uwang sa Kongreso ug Malakanyang.
Nipasidaan ang mga eksperto sa balaod nga ang bag-ong balaod nakalapas sa Konstitusyon ug sa kagawasan sa mga Pilipinhon. Apan gisumbalik nga di angayng mahadlok kon di sila terorista.
* * *
Wa ba tang kadungog sa mga nakigbisog sa kausaban nga gipasanginlang mga komunista? Nakalimot ba ta sa kaparian ug mga relihiyuso nga patakang gipasanginlan sa kapolisan sa mga krimen batok sa gobyerno?
Wa ba ta mahibawo sa kaliboan nga gipamatay kay gidudahang nahilambigit sa ilegal nga drugas? Wa ba ta magsubay sa padayong pagkabilanggo ni Senador Leila de Lima tungod sa mga pasangil nga way sukaranan?
Wa ba tang kadungog sa mga sakop sa media nga gihasi sa nagpungasi nga mga kaso?
Wa ba tang kabatyag sa pagkuyanap sa kahadlok sa pagtak-op sa labing dakong broadcast network sa nasud, ang ABS-CBN? Wa pa ba mabantang ang mga panghudlat sa kagawasan sa pagpadayag?
Ang pagkabanhaw sa pagbilanggo nga way pagtugot sa korte makapahinumdom nato sa ASSO (arrest, search and seizure order) sa 1972 nga nisangpot sa pagkahagsa sa demokrasya ug pagtumaw sa diktadora.
* * *
Taliwa sa ngiub nga palibot, makapasalamat ta sa mga manlalaban ug mga molupyo nga nipasaka og mga petisyon sa Korte Suprema. Mopatigbabaw bang hukmanan sa iyang kagawasnon, o igo lang sang moduko?
Samtang nagbarug pa ang demokratikanhong mga institusyon, nahisama na ta sa baki nga naglangoy sa kawa inanayng nagbukal nga tubig. Madasig ta sa pagtuo nga sa nagkalainlaing buhatan sa kagamhanan duna pay daghang mga tawo nga nagpabiling ligdong ug gawasnon ang panghunahuna.
Atong pasidunggan ang mga kawani sa gobyerno nga naminaw sa ilang tanlag ug wa magpahudlat sa pagtuman sa ilang katungdanan.
Hinaot nga modaghan sila. Mahinungdanon sila nga haligi pagpalig-on sa mga institusyon sa kagamhanan ug sa demokratikanhong sistema.
* * *
- Latest
