Daghang paagi ang kurapsyon

Nagkasabot ang PhilHealth ug mga pundok sa hospital ug mga medical association nga pangitaan og paagi nga mabayran na ang giingon nga mga utang sa PhilHealth sa mga hospital. Angayan i-takdo ang ilang mga records taliwala usab sa mga taho nga adunay hospital nga naghinobra ang pagpaningil.  Kon tinuod nga wa makabayad ang PhilHealth sa ubang mga hospital, mahimong hinungdan kini sa ilang pagpanira. Kon dili, mahimong maalkansi na usab ang gobyerno.  Kinahanglan magmabinantayon kay daghan paagi ang kurapsyon.  Fezteleern!

Milo vs. “mayluy-a”

Gipaneguro ni Mayor Edgar Labella nga adunay ihatag nga ayuda sa mga apektado’ng residente kon adunay ipahigayon nga lockdown sa ilang lugar ug nga seguroon niya nga ang pagpanghatag sa ayuda ipaagi sa mga Kapitan ug dili sa Milo aron malikayan ang pamolitika.  Maayo ang maong kamanduan sa Mayor.  Kay matud pa lage sa akong silingan, “Adunay Milo nga tarong apan ang uban halang og kinaiya.  Ang uban nga Milo, tsokolate ang lasa, apan aduna usab mora’g nilâgâ nga luy-a maong angayan sila tawgon nga MayLuy-a”. Gubat diay kini sa Milo batok “MayLuy-a”. Hala no!

Stay at home lang gyud

Adunay 160 ka sakop sa Special Action Forces ang idugang sa lokal nga 200 ka police personnel nga maoy tahasan sa strikto’ng pag-implementar sa protocols ubos sa ECQ  dinhi sa dakbayan sa Sugbo. Ang pagkatap sa kasundalohan ug kapolisan sa kadalanan, makapahinumdom sa estorya bahin sa panghitabo ug sangputanan sa “Liberasyon sa Manila” niadtong ikaduha’ng gubat. Sama sa Manila kanhi, maluwas ra unya ang katawhan sa Cebu City sa kuko sa katalagman apan moagi ang tawo sa tumang kalisod uban usab sa pagkagusbat sa ekonomiya.  Stay at Home lang gyud una ‘ta!

Tanghaga sa basura

Mimando si Lapu-Lapu City Mayor Junard Chan sa pagpaimbestigar sa daghang mga sinako nga ginamit nga syringes, blood sample vials, rapid test kits ug uban pang medical waste ang nakit-an nga nagpasad sa bakante nga lote sa Sityo Seaside, Barangay Pajo.  Sayon ra man tngale subayon ang tanghaga kon diin gikan ang maong mga medical waste. Gikan gayod kini sa mga hospital ug mga ubang mga health service providers; alangan na man kon gikan sa Jollibee o sa McDonald’s. Madahaan!

Naglubay-lubay ang IATF

Nagkapupos na ang gitakda nga ECQ sa dakbayan sa Sugbo apan giingon nga ang mga awtoridad naglibog pa kon unsa’ng mga dapita ang angay ipaubos sa mas estrikto nga “lockdown”.  Mora man og nagduwa-duwa ra ang taga-IATF ni’ng ilang paglubay-lubay.  Ang kalibog sa IATF dili makomparar sa kalibog sa katawhan kon asa na mangita og panginabuhian. Haum ang gipamulong sa bantugang Pilisopo nga si Cicero, “Daghan ang mahanaw gumikan sa pagduhaduha/paglubaylubay. Mahimo niining kawaton ang kahigayonan sa imong atubangan”. Pag-chure uy!