EDITORYAL - Tratamento ngadto sa Chinese tourist

Nagkarakara karon ang Department of Health hasta na ang mga nagkadaiyang local government units sa tinguhang dili makasulod ug makatakod dinhi sa Pilipinas ang novel Corana virus nga mikalas na og kinabuhi didto sa Wuhan, China.

Dinhi sa Sugbo, naninguha sab ang LGUs ilabi na nga duna kini mga direct flights gikan sa China ug uban pang mga nasud nga posibleng natakboyan na niini.

Mahinungdanon gyud nga ang mga LGUs managana para sa kaluwasan sa ilang mga konstituwente.

Sa pikas bahin, didto sa Kalibo, Aklan dunay 500 kapin ka mga turistang Chinese gikan sa Wuhan ang gitanggong nunot sa kabalakang dunay carrier nila og nCorona virus.

Samtang makasabot ra tingali ang mga Chinese sa gihimong panagana sa mga otoridad didto, murag dili sab tingali maayong paminawon kun i-deport sila pagbalik didto sa Wuhan nga mao karoy naigo sa maong makamatay nga sakit.

Dili makatawhanon kun kini buhaton kanila. Usa pa, mga turista sila ug angay sab isipon nga wala man tingali nilay gustong mobalik karon sa Wuhan aning mga panahona kay tabla ra nga gilawog sila ngadto.

Unsa nalay mahitabo sa relasyon sa Sugbo ngadto sa ubang mga lugar sa gawas sa nasud kun ingon niini ang pagtratar?

Lain sab kaayo paminawon kun kitang mga Pilipino maoy nabutang sa ingon niana nga sitwasyon. Unsaon nalang man kung wala bisan usa kanila ang nagdala sa maong sakit?

Mahimo ra mang i-quarantine lang una diha sa maong tugpahanan ug monitoron ilang panglawas sud sa pipila ka adlaw. Kung di gyud mahimo, magpatabang sa embahada sa China aron maoy mopili og mas luwas nga lugar balik sa ilang nasud samtang gipaningkamotan pa ang pagpangita og bakuna batok sa maong sakit didto sa Wuhan.

Maayong ipakita sa Pilipinas nga bisan sa kalisdanan sama niini nga sitwasyon, makamao kini moatiman og mga bisita.  Naila ang Pilipino sa pagkamaabi-abihon sa mga dumuduong, mao nga way rason nga tungod lang niini usbon ang naandang kustombre nga duna may laing mga pamaagi.