Atribido nga kaalyado

Napatik sa US Congress website ang balita nga mipalabang ang Senado sa Amerika og usa ka resolusyon nga nagsaway sa kagamhanan ni Presidente Duterte tungod sa giingon nga sayop nga pagbilanggo ni Senador de Lima dugang ang pag-awhag sa pagpalingkawas na kaniya. Nakatunob na man unta sa buwan ang mga Amerikano.  Apan niining ilang gibuhat, mora ra man sila ug “NAG-SUNTOK NA LANG SA BUWAN”.  Pagka-atribido na man gyud!

Langit ra’y nasayod

Taliwala sa kagubot ug pagduotduot sa daw lawod nga kadaghan sa mga debotos, gikataho nga ang Krus sa Itom nga Nazareno nabali atol sa tinuig nga prosesyon sa Traslacion. Daghan ang nakasaway sa pamaagi sa mga deboto sa Itom nga Nazareno pagpakita sa kalawom sa ilang pagsalig ug pagtoo taliwala sa kahasol, kalisod ug dakong sakripisyo nga mosangpot gani usahay sa disgrasya.  Sa pangutana kon husto o dili ba ang maong pamaagi sa pagpadayag sa pagtoo, tukma ang tubag sa akong silingan nga, “LANGIT RA ANG NASAYOD”. Na hala, duot-duot pa more!

Kakulang sa political will

Nunot sa kamanduan sa DILG ngadto sa mga opisyales sa barangay sa paghawan sa mga kadalanan diha sa ilang tagsa-tagsa ka hurisdiksyon sa mga illegal nga obstruksiyon, mipadayag ang mga barangay official sa kalisod pagtuman sa maong kamanduan  tungod sa nagkadaiyang rason.  Sayon ra sabton ang reaksyon habig sa mga barangay official.  Dili lalim makig-away sa mga tawo nga mao unya ang moboto kanimo panahon sa piniliay. “Politikanhong Kagahom, Hain ka?

Better late than later?

Andam na ang LTO pagpanghatag sa mokabat og 22,000 ka plaka sa mga sakyanan karong bulan sa Enero ug Pebrero ni’ng tuig 2020.  Apan ang maong mga plaka kabahin pa diay sa backlog sa tuig 2016, 2017 ug 2018.  Sakit kini sa LTO nga daw wala pa gayud mahatagi ug hingpit nga kasulbaran.  Alang sa mga hingtungdan nga motorista, maayo na lang kay sa kadugayan niabot na gyud. Matud pa sa Iningles, “Better late than later”.  Dakop na ang sunod mahitabo!

Daghan ang hambog, way pailob

Segun sa balita, duha ka batan-ong lalaki nga nagpanuigon ug 15 ug 18 anyos, nagsinumbagay nga misangpot sa  wala damha nga kamatayon sa usa sa mga nagkabangi.  Binata nga sungogsungog ra maoy hinungdan sa ilang panagbingkil.  Angayan na gayod ibalik ang subject nga Good Manners and Right Conduct sa mga tulonghaan.  Kon dili matudloan ang atong kabatan-onan sa maayong gawi ug pamatasan, makakita na kita ug mga kabatan-onan nga gaayo lang ang hambog apan kuwang sa pailob.  Kinsa ang tagsala?