Pagmatngon nga dili makaabuso

Gibutyag ni Mayor Edgar Labella sa dakbayan sa Sugbo nga dili ra niya ipaestrikto ang pag-clamp sa mga sakyanan nga iparking daplin sa mga karsada duol sa mga simbahan.

Apan dili lang usab unta moabuso ang mga motorista nga ang ilang mga sakyanan iparking nila sa dapit nga maglisud na ang pag-agi sa ubang mga sakyanan.

Sama kagahapon sa buntag, usa ka sakyanan diha gyud giparking dapit sa main entrance sa Cebu Metropolitan Cathedral nga may traffic sign nga “no parking” ug resulta, maglisud na ang pag-agi sa ubang sakyanan.

Maayo gani kay gibati og kaluoy si Major Andres Bayarcal, ang operations chief sa CITOM, ug wala na lang gi-clamp ang sakyanan.

Binastos man gud kaayo kon ipataka ra nimo’g parking ang inyong mga sakyanan nga makahasol na sa ubang motorista.

* * *

Wala gyud ko magkuwang sa pagpahimangno ngadto sa mga tag-iya og sakyanan nga dili magpataka parparking kay basin og ma-clamp kini sa CITOM.

Aw, resulta, daghang mga sakyanan ang gi-clamp sa CITOM kaniadtong Martes sa kaadlawon didto sa GMA Road sa Upper Barangay Apas.

Unya, bisan og na-clamp na ang mga sakyanan, ang ubang mga tag-iya namalik ra gihapon sa pagparking daplin sa mga karsada.

Ang rason diay kay ang ubang mga tag-iya sa sakyanan, wala gyuy laing lugar nga kaparkingan sa ilang nga units.

Luoy baya sab unta kay mahal na baya ang bayranan kon ma-clamp ang sakyanan, apan unsaon man nga ang inyong gihimo makarisgo man sa kinabag-ang katawhan.

Pastilan sab ning ubang mga tag-iya og sakyanan nga walay kaikog nga tungod sa ilang gihimo nasakripisyo ang uban. Mga baga kaayong nawong.

* * *

Akong ipahibalo kaninyo nga sugod Enero 2, madungog na ko ninyo sa usa ka oras nga programa sa radyo DYLA.

Ang programa nga Birador, inyong madungog gikan sa alas 8:30 ngadto sa alas 9:30 sa gabii gikan Lunes hangtud sa adlaw’ng Biyernes.

Ubani ko ninyo kay hisgotan nato ang nag-una nga mga isyu nga naglambigit ang publiko. Atangi!!!