Sige ka pa?

Matud pa sa taho, ang Securities and Exchange Commission mipahayag nga ang Investment Company nga Kapa-Community Ministry International Inc. (KAPA), nangolekta ug puhonan gikan sa publiko ubos sa konsepto sa “donasyon” nga adunay saad nga 30% nga tubo.   Midason ang SEC nga dili lang ang KAPA maoy angay bantayan sa publiko kay aduna pa’y lain nga susama ra usab ang modus. Unya, IKAW NGA NABIKTIMA, SIGE KA PA?

Hatag dayon kiha

Mi-awhag ang SEC sa mga nabiktima nga namuhonan sa pagpasaka ug kaso batok sa mga surambaw nga patigayon. Ehemplo ba kini sa pagya nga “Hatag karon, Kiha unya (Donate now, Sue Later)?

Wa mabati…kay saba

Pundok sa mga estudyante nadismaya sa kakulang sa konsultasyon mahitungod sa isyu sa pagpasaka sa tuition. Matud nila, padayon silang makigbisog alang sa ilang katungod sa usaka de-kalidad ug dali-makab-ot nga edukasyon. Matag tuig sila’ng nakigbisog; matag tuig usab nga mosaka ang bayranan sa eskuwelahan. Taliwala sa ilang kagahub ug kasaba, basin wala na hinoon mabati ang ila’ng kawsa.

Tulokibon nga kawsa

Mga lumolupyo sa Barangay Pit-os mipirma ug petisyon alang sa pagpasira sa ‘Landfill’ nga nahamutang diha sa ilang silingan nga barangay sa Binaliw tungod kay “supak sila sa baho sa basura nga karga sa mga garbage truck nga molabay sa kadalanan” sa ilang barangay.”  Aw, dili diay direkta nga baho sa landfill ang gireklamo. Tulokibon pa uyamot ang maong kawsa.

Friends before na

Baniog na ang panagbangi sa kanhi managhigala ug kauban sa Partido Barug-PDP Laban nga si Konsehal-Elect Nina Mabatid ug kasamtangang Konsehal Jun Alcover. Masinati ug mabasa nato ang ilang kasungian dili lamang sa mga pamantalaan kondili diha usab sa ilang tagsa-tagsa ka FB Account.

Alang kanila karon, ang mga letra nga FB aduna na’y lain’g kahulogan: dili na Face Book kon dili Friends Before na!