EDITORYAL - Kabaho sa Binaliw

Angay nga lilion pagbalik ni Cebu City mayor-elect Edgardo Labella sa pagsugod unya sa iyang termino kining sitwasyon  sa Binaliw Sanitary Landfill gikan sa operasyon niini hangtud na sa mga reklamo sa mga residente nga direktang naapektahan sa operasyon niini.

Gatosan ka mga residente palibot sa maong landfill ang nireklamo gumikan sa dili masingo nga kabaho ug nabalaka silang mangasakit.

Apan ang operator sa maong sanitary landfill nga ARN Waste Management Inc. nihimakak sa pasangil sa mga residente kay matud pa nila nagtuman sila sa mga rekisitos ug lagda sa pag-operate niini subay sa balaod.

Dunay duha ka mga habig nga nagbangga niini, ang habig sa kompanya ug ang habig sa mga nireklamong mga residente. Way laing makaestorya bahin niini kondili ang duha ra gyud ka kampo.

Apan sa pangutana kun kinsay nagtug-an kanila sa tinuod, dili mahimong walay mopatunga niini. Sa habig sa mga residente, may katungod silang moreklamo tungod kay sila maoy direktang nakahanggab sa baho sa basura, samtang ang kompanya mahimo sab nga moinsister nga dili sa ila mismong landfill gikan ang baho. Sa asa diay gikan?

Dili mabasol ang mga residente nga moreklamo kay unsa may kalibotan nila kun giunsa pagproseso ang basura diha sa sud aron dili manimaho?

Ang bugtong nilang nahibaw-an nga ang maong pasilidad labayanan ug bahiganan sa basura uban sa pasalig sa kompanya ug sa siyudad nga environmentally compliant sila. Apan nganong naa may mangalisbong basura?

Karon, kinahanglang ipatan-aw ni Labella kun asa gyud nagagikan kining nanimahong basura, kun sa sanitary landfill ba gyud o sa mga garbage trucks nga naghakot sa basura padung sa landfill.

Importante kaayo ang maong pasilidad para sa dakbayan ug sa mga silingang mga siyudad. Timbang-timbangon gyud kun asa ang mas daghang makabenepisyo ug kini maoy lagda sa balaod.

Dili kinahanglang magkagubot ang mga hingtungdan. Pangitaon kun unsay problema ug pangitaan dayon og solusyon mao ra nay angay buhaton.