EDITORYAL - Hagit sa transport sector

Ang transportasyon usa sa mga gikinahanglan alang sa kauswagan ug kalamboan sa usa ka lugar. Gikan sa pribadong mga sakyanan, pang-negosyo ug sakyanan para sa publiko sa ilang pag-adto sa ilang mga destinasyon.

Dako na kaayo ang kausaban sa mga pangpasaheroang mga sakyanan ug ang labing uso mao kining app/online-hailing transport networks sama sa Grab ug Uber kaniadto ug ang Angkas. Ang mga PUJs ug taksi nakabatyag na og gamay nga kalisdanan pagabot sa ilang kita. Kay dili na sama kaniadto kakusog ang ilang operasyon karon nga daghan na silang mga bag-ong kakompetinsya.

Kaniadto, sosyal na kaayo ang mga tawong makasakay og taksi, apan dihang nauso na kining transport network companies nga  ma-book pinaagi lang sa selpon, nakuhaan gyud ang gidaghanon sa mga pasaherong manakay kanunay og taksi ug PUJs.

Ang mga pasahero karon nangreklamo man gud nga ang mga taksi karon dili presentable. Dunay ubang reklamo batok sa mga drayber tungod kay  way batasan, mamili og pasahero ug hugaw . Dili gyud mabasol ang mga pasahero. Samtang sa PUJs, naa pay traffic ug paugatay sa mga drayber ug dili manukli og tarong.

Itandi sa online bookings, ang awto nga sakyan o motorsiklo way ilhanang kini pangpublikong pasaheroan kay susama man og pribado nga sakyanan.

Ikaduha, presentable ug mga bag-o ang sakyanan ug motor, hasta ang mga drayber maayo og pamatasan ngadto sa ilang mga pasahero. Kini maoy angayan nga tutokan sa mga taxi ug PUJ operators kung gusto silang makasugakod sa ilang negosyo. Kinahanglan nilang mo-invest sa bag-ong mga sakyanan ug estriktuhon ang pagpili sa ilang mga drayber nga makamaong moatiman.

Wa na karoy kwestyon kun mahal ang plete, basta hamugaway ug komportable lang ang biyahe, apan ang mga pasahero siguradong pilion kadtong limpyo, hamugaway, komportable ug labaw sa tanan barato ang plete nga unta madalit sab sa PUJs ug taksi.