Cyber yaya
MARAMING musmos ang lubhang lulong na sa paglalaro ng mga computer games sa kanilang mga electronic gadgets. Kung tutukoy tayo ng isang masamang bisyo kasunod ng droga, ito ay ang mga applications sa mga computers na nagtuturo ng masama sa mga bata.
Madalas, ang mga bata ay pinababayaan na lang ng magulang na maging abala sa kanilang tablets o cellphone dahil nagsisilbing parang yaya ang mga instrumentong ito upang hindi sila abalahin ng kanilang mga anak.
Ang sabi ng isang nanay na kilala ko, pinababayaan niyang mag-gadget ang anak niyang lalaki na 6-taong gulang pa lang dahil nananahimik ito at hindi siya iniistorbo sa bahay.
Mabuti kung ang pinupuntahan ng mga bata ay mga educational sites na makatutulong sa pag-unlad ng kanilang karunungan, pero hindi. Hindi makontrol ang pagpasok sa cyber space ng mga computer programs na humihikayat sa mga bata na manakit sa kapwa, Pati na sa kanilang sarili. Minsan, hinihikayat ng mga applications na ito ang musmos na magpatiwakal.
Siguro, narinig na ng marami sa radio at telebisyon at nabasa sa diyaryo ang tungkol sa Momo challenge at iba pa na humahamon sa isang bata na manakit o saktan ang sarili. Bago ito, naririnig na natin ang mga pornographic at dating sites na dito ay marami na ang napahamak.
Panawagan sa mga magulang, huwag nating ipaubaya ang ating mga anak sa computers. Walang masama sa paggamit ng mga ito basta’t ginagabayan natin lagi sila. May mga games na educational. Okay ang mga iyan.
Ang malungkot, walang magagawa ang sino man upang pinilit ang mga tangkang paglalagay sa Internet ng mga applications na magpapahamak sa ating kabataan. Kaya tayo nang mga magulang ang sumubaybay sa ating mga anak.
- Latest
