EDITORYAL - Nisamot ba hinuon?

Pagkakuyaw naman gyud aning ilegal nga drugas dinhi sa kabisay-an. Bisan pa man sa grabeng gipangusgang kampanya sa law enforcement units ug daghan na ang mga nitikangkang, daw mas migrabe naman hinuon. Niadto lang miaging gabii didto sa Vista Montana Subdivision, Barangay Casili, Dakbayan sa Mandaue gironda sa kapolisan ang usa ka bodega nga giingong gibutangan sa daghang shabu.

Tuod man nasakmit sa kapolisan ang dul-an P50 milyones nga kantidad sa gituohang shabu.

Si Police Regional Office 7 director Debold Sinas miingon sa mga tigbalita nga gikan sa Manila ang maong mga shabu ug gipatuyok  paingon sa Ozamis City ayha pa gipadala paingon sa Cebu pinaagi sa roll on roll off nga barko.

Wala pay gitug-an nga impormasyon ang kapolisan kun kabahin ba kining maong shabu sa nakalusot nga P11 bilyones nga kantidad sa gituohang shabu diha sa Bureau of Customs pipila ka buwan na ang milabay.

Gawas sa maong P11 bilyones nga shabu may lain pang P6.4 bilyones nga shabu ang nakalusot gihapon sa BOC niadtong 2017. Ang maong mga kaso gihimoan na og inquiries diha sa Kongreso human ang Philippine Drug Enforcement Agency mireklamo bahin niini.

Ang nasakmit nga shabu dinhi sa Sugbo niadtong Biyernes sa gabii gibanabanang moabot lapas pito ka kilo. Ang ingon niini kadaghan nga shabu sigurado gyung kaliboan sa mga kabataan sa Sugbo ang mangabuang.

Ang makapahiubos kaayo, daghan naman untang mga nangadakpan, napatay ug nangasakmit nga drugas apan wala naman hinuon karoy hubas-hubas.

Kun itandi sa nangaging mga katuigan nga giisip man nga maoy panahong napista ang mga druglords tungod sa pagpasagad ug mga pasangil nga may ‘proteksyon’ sa mga naa sa katungdanan sa nanglabay nga administrasyon ang mga druglord, gramo-gramo ra may masakmit.

Apan karon na hinuon nga kusog kaayo ang “war on drugs” ug daghan na ang mga napatay  mas nigrabe naman hinuon kay kinilo naman ang pirmeng makuha dinhi sa Sugbo. Wa diay mahadlok ang mga sindikato?