EDITORYAL - Subay gyud sa proseso

Nakombikto na gyud ang tulo ka mga polis nga giakusahang nagpatay sa estudyanteng si Kian delos Santos niadtong Agosto 16, 2017 didto sa Caloocan City nga nakapasuko og maayo sa publiko ug nakapawalay pagsalig nila ngadto sa kapolisan sa kampanya kontra ilegal nga drugas.

Sa pagsugod palang sa war on drugs ni Pres. Duterte daghan dayon ang nakauyon tungod kay tinuod man gyud nga dako na kaayo ang problema sa ilegal nga drugas dinhi sa nasud.

Apan miabot sa punto nga nagsugod na og kwestyon ang publiko sa nagtipun-og nga mga pagpatay, nga diin sagad sa mga nakalas may mga record sa ilegal nga drugas apan walay nasayod kun kinsa ang mibuno kanila.

Mas misamot ang pagduda tungod sa nakadaghan usab nga mga nangamatay sa anti-illegal drugs operations nga kwestyonable kaayo ang sirkumstansya sa ilang pagkapatay ilabi na nga ang pipila sa nakalas mga bata sama kang Kian.

Posibleng husto si Public Attorney Office Chairwoman Persida Acosta nga wala motuong extra-judicial killings kining mga nahitabo sa mga drug suspects sama sa nahitabo kang Kian.

Sa iyang tan-aw dunay gustong mosabotahe sa kampanya sa presidente kontra ilegal nga drugas kay kun extra-judicial killings na gani, nagpasabot kini nga adunay mando gikan sa taas nga kini buhaton ug bisan unsaon pa og kiha ang mga responsable dili gyud sila makombikto.

Dili na kini angay ikahibulong gikan ni Acosta kay siya abogadong kawani sa gobiyerno.  Apan posibleng tinuod ang iyang pagduda o ba kaha paturagas lang gyud ning uban kay nagtuong duphan sila sa pangulo bisan makapatay sila’g inosente.

Kaning problema sa drugas angay gyud mahunong na. Apan mas nindot kun kini makab-ot mapatay man o madakpang buhi ang suspek basta tanan pinasubay gyud sa proseso ug sa balaod.

Tungod kay sa pagkakaron, ang presidente maoy gibasol sa tanan. Ang nahitabo kang Kian kakuhaan unta og leksyon.