Pabiling seryoso

Bisan pa sa subsob nga operasyon sa otoridad, padayon gihapon nga mikuyanap ang negosyo ilegal nga drugas sa lalawigan sa Sugbo. Gani, mas binulto na ang druga nga nakonpiska sa nakalabay nga mga semana.

Sa akong paminaw, morag wala milurang ang negosyo sa drugas dinhi sa atong lugar.

Kini bisan pa man sa gihingusgan nga kampanya sa otoridad nga daghang mga pusher ug ubang nalambigit niini ang nangasikop ug napatay atol sa ilang operasyon.

Hinuon ang maayong balita mao nga minilyon nga kantidad na ang kasagarang masignit sa kapolisan. Gani, dili pa lamang dugay nasakmit ang halos P40 milyones nga kantidad sa shabu gikan sa usa ka batan-on didto sa Barangay Tisa ning dakbayan sa Sugbo.

Mao kini ang resulta sa saad ni Senior Superintendent Dibold Sinas, ang direktor sa Police Regional Office-7, atol sa meeting sa Cebu Citizens Press Council niadtong kasaulogan sa Cebu Press Freedom Week sa niaging September.

Matud pa ni Sinas, dili na ang kapolisan manumbaling og gukod niadtong ginagmay nga pakete sa drugas. Ila kuno nga giatiman karon ang pagronda niadtong bigtime drug dealers. Ug mao na kini ang resulta sa iyang pamahayag.

Karon halos kada adlaw na ang pagkompiska sa binulto nga drugas dinhi sa Metro Cebu. Hinuon maayo kini nga lakang sa kapolisan.

Nagpasabot kini nga misanong gayud sila sa panawagan pagpakusog sa krusada batok druga.

Sa laing bahin, dili usab maayong tilimad-on kining mga kinilo nga drugas nga nasakmit sa otoridad halos matag adlaw.

Kini tungod kay nagpakita lamang kini sa ka grabe nga negosyo sa drugas dinhi nga pabiling dakong concern sa otoridad.

Mao na nga makaingon ko nga insakto gayud ang birada ni Presidente Rodrigo Duterte nga nag-una ang Sugbo sa mga lugar sa nasud diin naghitak ang druga. Seryoso kini nga problema nga angay lamang himuong prayoridad sa otoridad.