Kalamboan sa bukid

Kon anaa ka sa ubos ug maghangad nga magtanaw sa taas pulos lang gyud bukid ang imong makita pero kun imong katkaton ug anaa ka na sa pinakataas imo nang makita ang nagtadlas-tadlas nga kadalanan sa kabukiran, ug timan-i, aspaltado ug sementado ang maong mga dalan ug kun duna may dili pa aspaltado ug sementado mubo na lamang kini ug nakahan-ay na usab ang pundo alang sa pag kongkreto niini.

Ang dalan nga akong giingon gituyo sa paghimo aron mapalambo ang gipasiugdahan nga agri-turismo nga proyekto.

Gawas sa maayong dalan, makapabusog pud sa imong mga mata ang mga maanindot nga talanawon nga imong makita sa dapit kun nakapatong ka sa Ablayan Peak sa lungsod sa Boljoon.

Ang mga dapit nga akong nalabyan klarong nakapahimulos na sa gipasiugdahan nga agri-turismo nga proyekto sa ikaduhang distrito sa lalawigan sa Sugbo.

Kaniadtong adlawng Domingo, Nobiyembre 4 guest nako sa Gerry Auxilio Live On Facebook nga inyong makita matag alas 12:00 - 12:30 sa udto matag Domingo ang kongresista sa ikaduhang distrito sa lalawigan sa Sugbo nga si Willy Caminero.

Apan sa wala pa ang interview iya una akong gisuroy sa iyang  gipasiugdahan nga proyekto sulod sa duha na niya ka termino isip kongresista sama sa covered court sa kabarangayan ug mga dalan sa kabukiran nga nagdugtong sa kalungsoran nga mipalambo ug mipadako sa agri-turismo nga programa sa gobiyerno.

Ang maanindot nga kadalanan nga magtadlas sa kabukiran dako og ikatampo sa pagpalambo sa usa ka dapit tungod kay matabangan man niini ang mga anaa nagpuyo sa bukid nga mapadali ug mapasayon ang pagdala sa ilang mga produkto aron mapahimuslan sa ubos.

Ang agri-turismo makapaminus sa urban migration ug makapalambo sa kahimtang sa mga nagpuyo sa bukid busa maingon nato nga nagsubay sa sakto nga dalan ang mga proyekto nga gipasiugdahan ni kongresista Willy Caminero. Maayo ning sundon sa uban.