Sugilanon ni Sinas
Bisan sa way kinutoban nga duguong mga panghitabo sa nangaging mga adlaw, makapakugang ang sunodsunod nga patay sa nagkalainlaing bahin sa Sugbo kagahapon.
Mas makapakugang nga dunay duha ka survivors sa pagpamusil sa bukirang barangay sa Malubog sa Dakbayan sa Sugbo nga nipatay og lima ka tawo.
Labing makapakugang ang pasangil sa duha nga mga polis ang nidakop ug nipatay sa ilang kaubanan ug nga maapil unta sila kon wa pa makalayat ug makatago si Antonio Ruiz Belande ug kon wa pa nagpakaaron ingnon nga patay na sa kasagbotan si Sharmaine Puran.
* * *
Apan ang hapit gyud makapahulog nako sa lingkoranan mao ang pangangkon ni Heneral Debold Sinas, ang kinatas-an nga opisyal sa kapolisan sa Sugbo ug Central Visayas:
Wa mamasangil silang Belande ug Puran sa mga polis kon dili ang mga sakop sa media mao ang nagsige og hulhog nila.
Matud ni Sinas tungod tingali sa kakalit sa mga panghitabo ug tungod sa grabeng kakuyaw nga ilang nasinati, wa pa sa ilang tarong nga panghunahuna silang Belande ug Puran ug busa nidason na lang sa sibaw nga pangutana sa media kon mga polis ba ang responsable.
* * *
Mas naalarma ko dihang nakaamgo nga kaming duha si Rhea Soco sa DYAB Radyo Patrol ang labing unang nakahinabi ni Belande ug nga si Annie Perez sa TV Patrol Central Visayas ang usa sa labing unang nakahinabi ni Puran ug busa maoy labing unang nasultihan sa ilang pasangil batok sa mga polis.
Alang sa kasayuran ni Sinas wa intawon mi nanghulhog.
Silang Belande ug Puran ang nanghangyo nga unang makigsulti sa media ug boluntaryong niluwat sa pasangil.
* * *
Tungod sa talagsaong katakos ni Sinas pagmugna og mga sugilanon—apil na ‘tong polis nga giingong napusilan sa Carcar City apan iyang gipamugos nga didto naigo sa Pinamungajan—gikuyawan ko nga kon moinsistir silang Belande ug Puran nga mga polis ang nidakop ug nisuway og patay nila, usbon na sang Sinas ang iyang bersiyon.
Human niya pasanginli ang mga sakop sa media nga nanghulhog og pangutana, gikuyawan ko nga karong adlawa tulisukon na gyud niya ang samokan nga mga sakop sa media sa Sugbo nga maoy tinuod nga responsable sa pagpamusil sa mga biktima.
* * *
- Latest
