EDITORYAL — Luho nga Christmas parties

Hapit na sab ang kapaskohan ug siguradong wala ug tuo nasad ang mga salo-salo sa mga Christmas parties karong sunod bulan sa Disyembre.

Apan pipila ka mga kompanya karon palang bulan sa Nobiyembre nagpahigayon na og advance Christmas party para sa ilang mga empleyado kay galikay sila sa mga daghang mga kalihokan sa kapaskohan. Ingon niini na kadako ang kausaban, ang naandang salo-salo sa mga managhigala, managkauban sa trabaho, ug bisan gani sa ubang mga pamilya matag Pasko giusab na aron mahaom sa kadaghan sa mga kinahanglang ‘importante’ pud nga mga buhatonon.

Kasagaran hinuon ani gikan sa pribadong sector. Tingali tungod ni kay ang ilang mga kadagkoan, mga opisyales, duna say mga naka-eskedyul na nga tambungang mga parties kauban ang mga halangdon pud nga mga tawo sa ilang hut-ong.  Pero sa mga buhatan sa gobiyerno, nagpasidaan na ang Department of Budget Management (DBM) sa tanang ahensiya sa gobiyerno nga dili maggasto-gasto sa pagpahigayon og salo-salo sa kapaskohan.

Sa gipagawas nga Circular Letter 2026-15  ning semanaha gipasidan-an sa  DBM ang mga buhatan sa gobiyerno nga dili usikan ang pundo gikan sa mga magbubuhis.

Kaning bulan sa Disyembre nabantayan sa DBM nga dagko kaayo og gastos ang mga opisina sa gobiyerno, tungod daw sa ilang mga ‘planning sessions’ para sa sunod tuig. Pero ang gigamit nga kwarta, pundo sa ilang opisina.

Husto pud ni nga pasidaan, kay karong panahona nga mahal ang presyo sa lana ug taas kaayo ang inflation rate tungod sa paghuyang sa gahum sa piso kontra dolyar, magbaton pud unta og pagbati ang mga naa sa gobiyerno sa kahimtang sa katawhan diha sa ubos.

Lain man pud kaayo paminawon nga pwerteng gasto sa kwarta sa ilang mga opisina gikan sa budget sa gobiyerno, usahay, tungod sa naghinobra ang gastos, daghan kaayong pagkaon ang nangausik.

Pero ini og gawas nila sa venue sa ilang parties o b aka diha mismo sa ganghaan sa ilang mga opisina naay mga tawong nangligdas sa dalan sa gawas sa ilang mga opisina nga walay sulod ang mga tiyan.