Way disiplina ug tapolan nagpares

Dili na gyud matabang ang kahuot sa traffic sa Metro Cebu, gawas nga daghan na kaayo ang mga sakyanan halos usab sa mga nagmaneho walay disiplina, dugangan pa sa mga traffic enforcer nga kuwang og katakos sa pag-manage sa traffic dili man hinoon tanan.

Sama na lang niining intersection sa Salinas sa Lahug dakbayan sa Sugbo nga mangatanggong.

Ang mga sakyanan gikan sa IT Park nga mo left turn sa intersection magpatuyang pagdasdas bisan og nag-urong na ang gisundan tungod sa kahuot kay lagi go signal pa man.

Pagka swapang na man lang gyud nga dili mo give way, ang resulta matanggong ang mga sakyanan gikan sa Nivel hills nga mo left turn kay naalihan na man.

Isip mabuot nga driver bisan siguro og nagsiga pa ang go signal kon huot na, otomatik ka nga mohunong og dili molapas sa junction box.

Naa may naka-assign nga enforcer dihang dapita, apan wala may kapuslanan sanglit anaa ra man sa kilid magbarug og ayha molihok kon nangatanggong na ang sakyanan, ulahi na kaayo.

Halos kada adlaw nga mao kini ang sitwasyon dihang dapita panahon sa peak hours sa buntag ug gabii.

Dili ba mahimo nga bisan anang mga orasa lang mobarug ang enforcer sa intersection nga kontrolon niini ang mga walay disiplinang driver nga dili mopugos paglapas sa junction box?

Ako nakasabot gyud nga dili lalim ang trabaho sa mga traffic managers ilabi na kadtong kugihan kaayo nga mopasayon sa dagan sa sakyanan.

Apan dili na sad mao kon ang traffic enforcers naka uniporme nga hinay kaayo og lihok, usa ra ka kamot gani gamiton pagsinyas sa nagkalandrakas na nga trapik.

Gamay’ng push pa basin diay makatabang nga mapahapsay ang dagan sa mga sakyanan.