Mga polis sa Sugbo adik

Gihulagway ni Presidente Rodrigo Roa Duterte ang mga polis sa Sugbo nga puro adik. Matud pa sa Presidente, halos tanan, hasta ang mga opisyal. Hasta ang mga sakop sa Philippine Drug Enforcement Agency (PDEA) maski taas og ranggo mao pay distributor.

Kining maong pamahayag giluwatan sa presidente atol sa iyang pagpamulong atubangan sa 300 kapin ka mga mayor nga sakop sa League of Municipal Mayors of the Philippines nga gipahigayon dinhi sa Sugbo niadtong Martes, Agosto 21, 2018.

Sa maong okasyon, gihulagway usab sa Presidente ang Dakbayan sa Talisay nga hotbed sa gidili nga drugas. Dinhi gisaad sa Presidente nga dili na niya lugakan ang kampanya batok sa gidili nga drugas ug mapaabot sa mga Sugboanon ang estrikto nga mga anti-illegal drug program ilabi na sa  Talisay.

Kahibawo ko nga daghan nga polis ang wala makauyon sa pamahayag sa Presidente ilabi na gayud kadtong mga naningkamot pagmaayo nga mapaminusan kon dili man masulbad sa hingpit ang suliran sa gidili nga drugas. Pero dili sila makareklamo batok sa Presidente.

Sa kapolisan ayaw lang ninyo himoa nga negatibo ang pamahayag sa Presidente, hinuon, himoa ninyo kini nga kadasig ug gabay sa dugang pa ninyong pagpaningkamot sa pagsulbad sa suliran sa druga. Himoa ninyo kini nga kusog sa pagpakita ngadto sa Presidente nga sayop siya sa iyang gituohan.

Nasabtan pud nako ang Presidente sa iyang pagkadismaya sa kapolisan tungod sa kadaghan nga polis nga nagpabadlong ug nalambigit gyud mismo sa gidili nga drugas bisan pa man sa iyang pagdoble sa ilang suholan.

Mao ni ang rason nganong iyang gipatungan og tag lima ka milyon ka pesos (P5M) ang mga polis nga badlungon nga mapatay.

Dili sayon sa presidente ang paglimpyo sa usa ka organisasyon nga nahimo nang kultura ang kurapsyon maong akong gipaabot ngadto sa kapolisan ang pagsabot sa pamahayag sa Presidente.