Ayoha pag-imbestigar

Sayon ra baya gyud pagsuta kon unsay tinuod nga nahitabo sa pagkamatay ni SPO1 Roderick Balili, sakop sa PNP Regional Special Operations Group (RSOG).

Kini kon ang kadagkoan sa kapolisan mohimo lang gyud sa tukmang imbestigasyon ug nga wala sila’y gusto nga taguon.

Maikagon kaayo ang mga tawo karon nga masayod sa kalamboan niining maong kaso.

Mao kini ang labing init nga isyu karon kay daghan ang nagtuo nga ang polis mao gyud ang mibanhig sa PDEA Agent nga si Von Rian Tecson didto sa Perelos, Carcar kaniadtong miaging semana.

Duha ka version ang isyu, si SPO1 Balili may samad-pinusilan nga gidala didto sa South General Hospital sa Naga City, human nga si PDEA Agent Tecson gibanhigan ug gipatay sa mga nagsakay og motorsiklo.

Ang dapit nga didto gibanhigan si Tecson usa lang ka lungsod ang distansya paingon sa ospital.

Matud sa mga nakasaksi nga si Tecson nakabawos pa pagpusil sa mga mipusil kaniya, ug gani nahagbong kini sa gisakyang motorsiklo sa dayon na niining pag-ikyas, apan gihunongan sa mga kakunsabo nga nagsakay og puti nga sakyanan.

Apan si Police Regional Director Debold Sinas miingon nga nakaangkon og samad-pinusilan si Balili kay naigo siya pag-unay sa iyang armas diha nga aksidente kining mibuto samtang nagpahigayon og pagpaniid sa usa ka drug pusher didto sa Pinamungajan.

Pananglit ako maoy imbestigador sa kapolisan, ug nga wala ko’y gikahadlokan kon unsay mogawas sa akong pakisusi, ingon niini ang akong himoon.

* * *

Una, sutaon nako kon nakalapos ba ang bala sa lawas ni Balili. Kon wala gani makalapos ang “slug” sa bala, aw mas sayon ra kini nga mahibaw-an kon nagsulti ba sa tinuod si Sinas.

Kon wala makalapos ang “slug” sa bala, nakuha gyud kini sa doktor, kon kini gi-autopsy.

Mahibaw-an man sa record kon unsay giisyu nga armas ni Balili, ug pinaagi sa gitawag og ballistic test, mahibaw-an kon ang nakaigo niya, ang iya ba nga armas.

Timan-i nga gitunol kuno sa laing polis ang armas ni Balili kay didto man kini sa front seat sa gisakyan nilang awto, ug si Balili didto man sa likod.

Husto ang uban nga nagduda kay ang gitug-an ni Sinas, kaduha gyud maigo si Balili.

Ambot og na-recover ba ang 9 millimeter pistol ni Tecson? Kon na-recover man, i-ballistic test sab kadto, ug itandi sa slug nga nakuha gikan sa lawas ni Balili.

Nagduda ang katawhan kay ang kadagkoan sa kapolisan mapanagan-on kaayong mohatag og mga inpormasyon, ug posible nga ang mga reporters, maikog nga mosukitsukit.

Daghan pa unta nga angay’ng ibatbat nato, apan wala na ta’y luna.