Kadudahang bersiyon ni Sinas
Abunda ang mga sukaranan sa sibaw nga pagduda sa pangangkon sa kapolisan nga ang namatay nga si SPO1 Roderick Balili naunay sa iyang kaugalingong armas atol sa operasyon batok sa ilegal nga drugas sa Pinamungajan sa kasadpang Sugbo dungan sa pagbanhig ug pagpatay sa ahente sa Philippine Drug Enforcement Agency (PDEA) sa Dakbayan sa Carcar sa habagatang Sugbo.
Maghisgot lang ko og duha:
• Una, ang gidaghanon sa mga samad nga nakapatay niya; ug
• Ikaduha, ang kalangay sa kapolisan sa pagpahibawo sa ilang bersiyon sa tinuod nga nahitabo ni Balili.
* * *
Si Superintendent Reyman Tolentin, tigpamaba sa Police Regional Office sa Central Visayas, ang niboluntaryo sa kasayuran nga ang namatyan ni Balili mao ang duha ka samad pinusilan sa iyang dughan.
Kay wa pa may gipagawas nga opisyal nga resulta sa autopsy, ug kay mga polis ra man sab ang naghimo sa autopsy, ang kasayuran rang Tolentin ang nahibaw-an sa mga Sugbuanon unsay namatyan ni Balili.
Kon aksidente nga napusilan ni Balili ang iyang kaugalingon, lisod nang daan nga tuohan nga sa dughan siya naigo.
Mas lisod dawaton nga kaduha niya napusilan ang iyang kaugalingon.
* * *
Si PRO 7 Chief Debold Sinas ang bugtong tinubdan sa mga detalye sa giingong pagkaunay ni Balili sa iyang armas. Matud ni Sinas gitunol sa polis nga nag-drive sa Toyota Altis ang .9mm nga pistola ni Balili dihang nakaagi ang sakyanan og libaong maong nibuto ug naunay si Balili.
Dako ba kaayo ang libaong nga ilang nabuwasotan nga kaduha gyud nibuto ang pistola?
O duha sab ka libaong ang ilang nahulgan ug nibuto ang pistola tumong ni Balili sa matag untol sa sakyanan?
* * *
Lunes pa sa hapon, pila lang ka takna human napatay si PDEA Agent Von Rian Tecson, nga nakuha sa media ang ngan ni Balili.
Martes sa buntag giila na siya sa press conference ni Cebu City Mayor Tommy Osmeña.
Biyernes na, upat ka adlaw human sa insidente, nga niinsistir si Sinas nga sa Pinamungajan napusilan si Balili.
Sa sinugdanan nagdumili gani ang kapolisan paghatag og kasayuran kay wa kuno sila pasudla sa ospital.
Murag nagpaabot pa ni Sinas nga mahibalik sa Sugbo una nakahatag sa bersiyon.
* * *
- Latest
