Overkill ba?

‘Overkill’ maoy paghulagway sa mga supporters ni anhing SPO1 Adonis Dumpit sa iyang gidangatan sa mga kamot sa National Bureau of Investigation ug sa mga kauban niyang polis nga sakop sa Regional Intelligence Division.

Kini tungod kay ang resulta sa autopsy sa iyang patay’ng lawas nagpakita nga nahiagom siya og 14 ka samad pinusilan diha sa nagkadaiyang bahin sa lawas apil na sa iyang ulo. Ang resulta sa autopsy nagpakita sab nga paubos ang trajectory sa bala ug nga layo ang nagpusil niya.

Dili nimo mabasol ang mga dumadapig ug higala ni Dumpit nga moingon nga overkill ang pagpatay niya. Ang pulong overkill nagkahulogan og subra nga paggamit og pwersa kaysa gikinahanglan. Ang pangutana, subra ba ang 14 ka samad pinusilan nga nahiaguman ni Dumpit?

Sa ordinaryo nga sitwasyon, wa’y lalis subra ra kaayo ang 14 ka samad aron patyon ang usa ka tawo. Apan angayan nato nga hinumdoman nga engkwentro ang nahitabo. Si Dumpit giingong giatangan sa mga sakop sa NBI ug RID tungod sa report nga nagdala ni og drugas.

Dihang gipahunong si Dumpit ug nagpaila ang mga awtoridad, giingong nibunot ni sa iyang armas ug namusil, hinungdan nga napugos pagbawos ang mga operatiba sa NBI ug RID.

Wala ko masayod kon pila ang miuban sa operasyon, apan ibutang ta og dunay 14 sila ka sakop, silang tanan nagdungan sa pagpabuto tumong ni Dumpit, dili imposible ang gidaghanon sa iyang mga samad. Karon balik sa pangutana, overkill ba ang nahitabo?

Duna lang hinuon ko’y namatikdan sa resulta sa autopsy nga angayang tan-awon og maayo. Ang trajectory sa bala paingon sa ubos nga posibleng miluhod ug mitahan na si Dumpit dihang gipusil.

Apan ang NBI mipasabot nga tungod kuno kini kay nihupo si Dumpit luyo sa iyang motorsiklo. Tinuod, posible ni nga maoy nahitabo, apan hangtud nga dunay resulta sa ballistic exam nga magpakita nga natusak sa mga bala ang motorsiklo, magpabilin ang katahap sa tinuod nga hitabo.       Importante sab nga mapresentar sa NBI ug kapolisan ang resulta sa paraffin nga magmatuod nga nakapabuto gyud og armas si Dumpit.