Pagtrabaho gikan sa balay
Tungod sa pagpasar sa telecommuting bill sa ikatulo ug katapusang pagbasa sa House of Representatives, nabanhaw ang akong damgo sa pagpatuman sa sistema sa among sibyaanan, DYAB Abante Pa, Bisaya! Pila ka tuig na ang nilabay, dihang una namong nahisgotan ang kahigayonan nga dili na mi mangadto sa sibyaanan, mahimo ba nga magsibya gikan sa among mga pinuy-anan. Wa hinuon mi mangahas pagsang-at sa among sugyot ngadto sa kadagkoan sa ABS-CBN kay nabalaka nga dili pa andam ang teknolohiya, gawas nga mahimo mi nga kapasanginlan nga nangita lang og pasangil aron nga makaligoy.
* * *
Matentalon ang kasayon sa pagtrabaho gikan sa pinuy-anan. Gawas nga maka-iban sa kahuot sa trapiko sa Metro Cebu, makalingkawas sa kahasol sa pagbiyahe ug mas taas ang panahon paghimong mas undanon ug mas madanihon sa mga tulomanon:
Mag-”Pabuhagay” silang Edgar Gutierrez gikan sa Basak San Nicolas ug Jennyrica Vidad gikan sa Pit-os; magbalita si June Perez gikan sa Punta Princesa; motaho silang RC Dalaguit gikan sa Escalante, si Angie Saniel gikan sa Argao, si Rhea Soco gikan sa Daanbantayan ug si Ferdinand Mañus gikan sa Opon; ug mangomentaryo si Atty. Thads Bentulan gikan sa Ubay.
* * *
Bisan ang paghipos sa mga balita dili na kinahanglang biyaheon. Inay magyampungad sa press conferences nga makuha sa tanang manambong ang tanang tubag, mas dako ang kahigayonan nga makakuha og eksklusibong kasayuran pinaagi sa Facebook Messenger, Viber o Skype sa labing tabian nga mga tinubdan sa balita. Kinahanglan lang mi nga manggawas kon may sunog ug ubang katalagman. Apan mahimo gani nga mas paspas nga makakuha og video ug detalye sa FB Live sa mga nakaatol sa mga panghitabo.
* * *
Tungod sa kakulian nga wa kapugngi, gitugotan ko sa among kadagkoan nga makasibya gikan sa balay duha ka tuig ang nilabay. Mao ni akong kasinatian:
Nagsige og kaputol ang akong Skype hangtud nga giluwas ko sa mas kasaligang signal sa Sky Internet;
Pagtibugsok sa internet, nidali ko’g balhin sa landline, nga gawas nga mas lata og tingog may mga higayon sab nga nipid-ok; ug
Bisan ang gitaod nga STL (studio-transmitter link) nisagarak ug niawop sa pipila ka higayon.
Magmalampuson lang ang telecommuting kon mas hinog na ang teknolohiya alang sa nagkalainlaing gimbuhaton.
* * *
- Latest
