Sa dakong panginahanglan sa tubig

Matag agi nako sa Gumbang dunay mopara aron mosakay pauli sa ila. Dala ang ilang mga linabhan. Gikan sila sa Gumbang kay ang Gumbang daghan man og tubig nga magamit.

Kini kay ang tubig mahinungdanon kaayo alang sa kinabuhi sa tawo. Ug gani nakahinumdom ko nga dunay advertisement kaniadto nga dunay babaye nga nakigsiping sa lalaki tungod ug alang sa usa ka botelyang mineral water.

Hinuon extreme ra kaayo ang maong advertisement apan ang punto mao nga mahinungdanon kaayo ang tubig ni bisan kinsa ning kalibutana.

Sama pud na sa kinabuhing espirituhanon, nagkinahanglan kita nga mamahimong presko sa kanunay aron magpabiling buhi ug dili patay.

Mao nga kita nagpangita sa tinud-anay nga kalipay ug sa atong pagpangita niini, padayon kitang nahisukarap sa mga tanghaga ug balighot sa tawhanong panlimbasog padung sa tinud-anay nga katagbawan.

Wa kita masayud sa atong padulngan ang mahinungdanon mao ang karon kay ang karon maoy mohulma sa atong ugma.