Makalibog gayod

Makalibog usahay ang utok sa mga Pilipino.

Niadtong nagsige og libotlibot si Bise Presidente Jejomar Binay sa Sugbo ug sa ubang lugar sa Kabisay-an ug Mindanao aron likayan ang pag-atubang sa Senate inquiry sa overpricing sa Makati parking building, pagpanag-iya sa asyenda nga adunay de aircon nga baboyan ug mga condo nga wala sa SALN ug uban pang isyung iyang giatubang, walay imik ang mga tawo.

Karon nga nasayop lang si Korina Sanchez sa iyang pamulong nga nangindahay’ng mohawa ang bagyong Ruby sa Philippine areas of responsibility ug maayong moadto na lang kini sa Japan, dali kaayong nakatingog ang mga tawo sa social media pagsaway sa beteranang brodkaster sa telebisyon. Ang nakapait pa gyud, ipamugos gyud og “associate” si Korina ngadto sa iyang bana nga si DILG Sec. Mar Roxas.

Unsa man intawon ang sala ni Mar nga bisan gamay’ng palpak sa iyang asawa nga si Korina, gamiton man nga black propaganda batok kaniya sa tuyo nga ipa-ubos ang iyang popularity rating.  Kun ingon na lang gyud niini kitang mga Pilipino nga mopiyong lang sa kasaypanan sa usa kay ang ganahan natong sawayon mao ang laing usa, dili gyud kita molambo tungod ning batasana.

Sa pag-adto ni Mar sa eastern Samar, inay dayegon gisaway na usab hinuon.

Ang wala pa nako ma-uyoni gihatagan pa og kahulogan ang pagkatumba niya sa motorsiklong iyang gimaneho. Walay boang nga tawo nga magpa-alig-alig og maneho og motorsiklo aron abton ang layong lugar sa Samar nga dili maabtan og upat ka ligid nga sakyanan, aron sa pagsuperbisar sa evacuation sa mga residente didto.

Adunay nanaway nga nganong mangunay man gyud si Mar nga kalihim man siya sa DILG ug ang iyang trabaho mao ang paglingkod sa opisina (sa ato pa dili mangunay) ug pagsugo sa mga opisyal ubos niya ug sa mga lokal nga kagamhanan base sa iyang polisiya. Kun mangunay si Mar sa pagsuperbisar, unsa may nakasayop? Tinuod kuyaw sa iyang kinabuhi, apan mas maayong mamatay siya nga nagtrabaho kay sa mamatay siya samtang mangawat sa kaban sa gobiyerno aron ipamalit og asyenda, baboyan nga de aircon ug mga condo.

Pangampanya? Mao gyud tinuod ang resulta kay nagpakita man siya sa mga tawo. Apan dili unta kini angay isyuhon mentras ang Pilipinas nag-ungaw sa kakuyaw tungod sa bagyong Ruby.

Sumala ba gud, niadtong Yolanda, nang-apod-apod si Bise Pres. Binay og mga relief goods pero ang putos adunay dako kaayong nakapatik nga “BINAY” ug iyang nawong.

Hain kadtong nagtrabaho, maoy dautan. Pastilan gayod!