BFP anniversary

Saulogon sa atong kabomberohan ang ika 23rd Bureau of Fire Protection (BFP) Anniversary karong Agosto 26 ubos sa tema: "Isulong ang Kaunlaran, Sunog ay Iwasan, Kaalaman at Pag-iingat ang Kailangan."

Dunay programa nga ipahigayon sa activity center SM City Consolacion ug ang guest of honor and speaker sa maong okasyon mao si Vice Governor Agnes A. Magpale.

Lakip sa mga highlights sa maong okasyon mao ang pagpang-apud-apod og Plaque of Recogniton sa mga pribadong indibidwal nga nakatampo sa paglambo sa serbisyo sa atong kabomberohan.

Ang mga awardees karong tuiga mao ang mosunod: Atty Augosto Go, presidente sa University of Cebu, Fr. Dionisio Miranda, SVD ang presidente sa University of San Carlos, Mr Juanito Quisumbing, Bohol Governor Edgardo M. Chatto, Bogo City Mayor Celestino Martinez Jr, Consolacion Mayor Teresa Alegado, Balamban Mayor Ace Stefan Binghay ug San Fernando Mayor Antonio Canoy. Napili ang maong mga awardees gumikan sa tabang ug dakong suporta nga ilang gihatag sa Bureau of Fire Protection. Lakip sa hatagan og pasidungog mao ang mga kanhi regional director sa BFP Region 7.

Sa pikas bahin, nagmalampuson ang gihimo nga  Tree Planting activity didto sa Barangay Panoypoy, Consolacion, Cebu niadtong Agosto 20. Dili tiaw ang among gitungas aron lang maabot namo ang maong lugar sanglit usa man kini ka mountain barangay.

Apan its all worth it kay sa wala pa namo maabot ang maong lugar, among nahapit ang Barangay Polog nga among gipahigayonan sa tree planting activity  sa miaging tuig ug among nakita nga dagko na ang mga kahoy nga among gitanom.

Nakadugang pa sa among kalipay ang pagpasalamat sa mga residente sa maong mga barangay nga akong nahisgotan gumikan sa among pagpakabana sa ilang lugar. Lauman namo nga ila unta’ng bantayan ang mga kahoy nga among gitanom.