Human ni Saddam ug Bin Laden, China na sab?

Daghan kaayong balay patigayon dinhi nga tagsa ray comfort room (CR) ug gisaway kini di lang sa kababayen-an kundi bisan sa kalakin-an.

Alang sa mga babaye discrimination kini batok nila, ingon usab niini  ang  mga lalaki, nga nagtuo nga diskriminasyon usab kini batok nila.

Gusto tingale sa mga tag-iya nga kun mahimo magdungan lang pagsud ang babaye  ug  lalaki kun magpatil-is, apan  kun pulos maglain ang  tiyan, kinsa  may angay  mo-una, babaye o lalaki?

Bakasyon na busa makahigayon na tingale ang tagdumala sa CTU pagpaayo sa ilang mga CR.

Makadaghan na kadungog Ang Espada og reklamo gikan sa mga estudyante ug sa mga  kawani sa maong eskuylahan.

Apan nagtuo kita nga gipaabot lang sa administrasyon nga magbakasyon aron di samok ang  pagtrabaho sa ilang mga CR.

Unya  kun  hiabtan sa ting-abli sa klase nga di gihapon maayo, aw .. ha?..  ambot lang… pero nagtuo kita nga sulbaron  gyud  sa tagdumala ang maong problema.

* * *

Hilom kaayo ang  kisaw sa mga balita  nga  nagkadaghan diay ang mga negosyo sa nasud  nga gipanirhan busa  nag-anam ka  daghan ang  nawad-an og trabaho.

Ang taga DOLE  maoy labing nasayud niini busa angay  magpasalamat ang mga kawani sa Cebu  nga  nagpabilin pa sa ilang  mga  trabaho ug giumentohan pa og P13 ang ilang allowance.

Samtang  kaliboan na ang  natangtang  sa ilang  trabaho nga way suweldo ug wa usay allowance sukad sa 2011.

Busa  kadtong anaa pay trabaho , kinahanglang magkugi ug mopakita sa maayong  kinaiya sa iyang  mga  kaubang  kawani  ug  labaw  sa tanan  sa iyang  manager.  

Naay uban, labaw pa sa manager kay kutob sa kaatubang niyang  kauban, pulos lang paninghag ug mao kini type sa mga trabahante nga angay pungison sa trabaho.

* * *

Mosukol gyud og  hinagitay  ang China batok US ilabi na sa isyu bahin sa bangi sa Pilipinas ug China bahin sa Ayungin  shoal.

Hinuon kun Pilipinas lay kontra sa China, aw water cannon ra may ilang gamiton batok  sa  mga Pinoy kay nasayud sila nga di kini mosukol  og  kombati batok kanila.

Apan kun US  na ang  ilang  kontra, ambot kaha kun tubig ba kaha  gihapon.

Wa ra ba maanad ang US nga  bugalbugalan sila  og  tubig, kay gani mikalma man ang Russia sa  pag-dominar sa  Crimea.

Nawagtang  ang mga  banggiitan  sa kalibotan nga si  Saddam Husein sa Iraq, ug ang teroristang si Bin Laden, ug karon  ang China na sab? ([email protected])