Way suplay mga ospital

Nagpasalamat ko nga nahitabo sa anak ni Talisay city Mayor Johnny delos Reyes ang nasinati sa mga pordoy’ng pasyente nga gipangbalibaran sa mga pampublikong tambalanan sa lalawigan sa Sugbo.

Si John Venth, 21, ug iyang uyab nga si Salve Vega nangadto sa Mandaue City District Hospital aron magpatambal human mabuthi sa radiator tank sa 1000cc nga engine sa motorsiklong ilang gisakyan. Pero bisan nag-antos sa kasakit, wala dayon matambali ang mga paslot mugna sa init nga tubig gikan sa radiator tank kay gibalibaran.

Gihimong rason ang kawalay police report, pero mitumaw ra ang tinuod nganong gibalibaran ang batan-ong anak sa mayor sa Talisay city: wala diay burn ointment ang ospital.

Pasayloon unta ko ni John Venth, apan makaingon ko nga maayo ra nga nahitabo kadto aron mabuksan ang mga mata sa mga politikong nagpaburot lang sa ilang bulsa pagtan-aw sa kahimtang sa mga public hospitals sa lalawigan nga mismong gapas, panghunad ug bendahe lisod kaayo hikit-an, ang pasyente pa ang papaliton. Nanghinaot ko nga ang nahitabo sa iyang anak makapatukmod ni Mayor JVR sa pagduso og mga pamaagi ngadto sa Kapitolyo pinaagi ni Gob. Junjun Davide aron kapahatan na og igong pundo ang mga district hospitals aron dili mahimong miserable ang sitwasyon sa mga pordoy’ng pasyente.

Si JVR kauban ni Junjun Davide sa Liberal party, mao usab ang polpol nga mayor sa Mandaue, si Jonas Cortes.

Ang nahitabo dili lang leksiyon kang Cortes nga wala magtagad sa ospital sa gobyerno sa iyang siyudad, kun dili lakip ni Junjun Davide aron dili siya mahisama kang kanhi Gob. Gwendolyn Garcia nga gisaway og taman-taman sa mga tawo sa probinsiya tungod kay ang pundo alang sa mga ospital sa kalungsoran wala makaabot ug giuna hinuon ang pagbayad sa mga kontrata sa mga trabahante sa maong mga ospital nga sakop sa agency nga gipanag-iya sa pamilyang Garcia.

Wala pa ko makadungog og programa gikan kang Junjun Davide pagtabang sa mga district hospital ug sa mga tambalanan sa kalungsoran nga hipatyan na lang og mga pasyente sa mga yanong sakit tungod sa kakulang sa mga medical supplies.

Maayo unta og magbaton og kaulaw ang mga opisyal sa Kapitolyo, lakip na si Junjun ug Bise Gob. Agnes Magpale ug mga sakop sa Hunta Probinsyal nga sa ilang pagpahat og P2.2 milyones alang sa “Suroy-Suroy sa Sugbo”, adunay mga ospital sa kalungsoran nga walay burn ointment, gapas, hunad ug bendahe nga ikasuplay sa mga emergency room.

Kun dili ko makadungog og pundo alang sa mga ospital sa lalawigan, makaingon na gyud kitang “Grabeha uy!”