Kinabuhing pobre

Suma pa sa US Census Bureau, mga 46.5 milyones sa mga Amerikano nag-ilaid kun nag-antos sa kapobrehon. Usa sa pito ka Kano didto sa Amerika kuno nag-antos sa kakabus o sa kapobre.

Dinhi sa ato daghan usab ang nag-ilaid sa kapobrehon. So mahimo bang ingnon nga pareha ra ta sa Amerikano?

* * *

“Pareha gud tawon ... dili oy,” suma pang Marita kinsa nakasinati sa kinabuhing pinobre sa California dihang namatay ang Kano niyang bana-bana.

Matud ni Marita, tinuod nga daghang kabus nga mga Amerikano apan makainom og init nga kape kada buntag pinarisan og pancake.

* * *

Naa kunoy mga sentro diin magpila silang mga kabus matag buntag alang sa libreng init nga kape ug pancake.

Naa say manghatag og simple free lunch ug dinner, kurtesiya sa mga charitable organization sama sa Salvation Army, Knights of Columbus, ug uban pa.

* * *

Matud pa ni Marita, ang mga pobre sa Amerika libre patambal sa public hospitals diin maayong pagtagad kanilang mga kabus. Dili parehas dinhi diin ang pobre dili tagdon sa mga taga ospital. Ug kun tagdon man gani singkahan.

“Ako suheto gyud sa maayo nga pagtagad sa mga kabus didto sa Amerika kay nakapuyo ako didto isip usa ka kabus,” suma pang Marita, kinsa nagtrabaho karon isip kahera sa usa ka tindahan.

* * *

TRIVIA. Greetings sa atong mga higalang sidewalk vendors diha sa Colon ug sa uban pang kalye sa siyudad sa Sugbo. Salamat sa inyong suporta sa Banat News.