EDITORIAL - Bag-ong liderato, bag-ong panggobiyerno

Sugod karong adlawa bag-ong mga tawo  ug  mga  lider  sa atong  panggobiyerno  ang  makita  sa  atong  mga  balay  lungsod, siyudad, lalawigan, kongreso  ug  senado.

Tinuod   may mga  nangatungdanan na  nga daan  nga  molingkod  sa  mao  gihapong katungdanan  ug  kun  maayo  sila  og  agi  sa milabay  nga  termino  hinaut  unta nga molabaw  pa  ang  ilang  ikadalit  sa katawhan  sa nasud  ning  higayona.

Kasagaran  kanila  nga  kuwartahan  na tungod  sa kadagko  nila  og negosyo  ug  kun  anaa  sila  sa katungdanan  maoy  ibutang  sa ilang hunahuna  nga  angayan  sila  sa ilang tahas.

Di  tungod  kay  magpatuyang  sila  pagpadaghan  sa ilang  kabtangan  ug  kuwarta  kundi  tungod  ug alang  sa kaayohan sa  nasud  ug  sa katawhang Filipino.

Kun  anaa  sila  sa ilang  katungdanan karon  kini  tungod  kay  gipili  sila  sa katawhan  busa  unsa  may  ikabawos  nila  sa nagbutang  kanila  sa maong  katungdanan.

Ang  mipili kanila wa mangayo  nga imong tabangan  ang  ilang kaugalingon  sa pag-atiman  sa ilang  negosyo  ug  panginabuhi.

Kundili  ang  gitan-aw  sa tanan  mao  nga  kun  may  kaayohan  nga ikahatag  ang kagamhanan, kana  alang  sa tanan  ug  dili  kay  kaniya  lamang.

Ingon usab  niini  ang  gilantaw  sa maong  mga  tawo  ngadto  sa usa ka  opisyal  sa gobiyerno  nga  mosugod  na  paglingkod  sa iyang  katungdanan  karong  adlawa.

Hilas tan-awon  ang  usa  ka  opisyal  sa gobiyerno  nga  sa  wala  pa  mapili  nga  opisyal  simpli  ang  pagpuyo, apan  dihang  namontar  na isip  lider,  o  diha  sa usa  ka  katungdanan  pang-opisyal  sa kagamhanan, mikalit lang  sa pagka-adunahan  kansang mansion  migasto na  og  minilyon ka pesos.

Kanindot tan-awon  nimo  sa imong  kaugalingon,  kun  ang  maong  salapi nga  imong  gigasto  sa maong  proyekto, imong  pinaningkamotan  sa maayong  paagi.

Apan  kun  iya  sa katawhan  ang maong  salapi,  sama  ra gihapon  ka  sa daghan na kaayong  mga tawo  nga  nangamatay  nga  gibilin  sa  ilang  mga  anak  ang kiniriwan  nga  kabtangan ug pag-abot  sa adlaw  sa paghukom  magun-ob  ug  ang   aso sa maong  kiniriwan  maoy  mosukmat kanimo hangtud  sa kahangturan.