Fire Safety alang sa kabataan

Nagsugod na ang kainit sa pulitika dinhi sa Sugbo. Gani makabalita na kita sa kun kinsa ang managan ug nagpailang mga mokandidato sa bugnong lugaynon sa Mayo 2013.

Sama sa nanglabay nga eleksyon ang inyong kabomberohan nagpabiling neutral ug walay gidapigan kay gidili man kini sa balaod ang pag apil-apil sa kalihokang pulitika o ba kaha ang pagpamolitika.

Personal lang nako kini nga awhag sa publiko nga hinaut makat-on unta kita pagkilatis sa mga politiko nga magpapili ug dili unta kita magpahaylo sa salapi ug isentro ang konsensya nga maoy atong giya sa pagpili sa buot moserbisyo sa katawhan.

Sa habig sa inyong kabomberohan, mas maayo gyud unta gani nga pilion kadtong mga nagpapili nga dunay nahunahunaang programa nga makapalambo sa pwersa sa atong tigpatay sunog.

Sayud naman siguro ang publiko kun unsa na ka mga karaan sa atong mga ekipo sama sa firetrucks nga napalit panahon pa ni anhing Presidente Ferdinand Marcos nga mao usab ang utok sa Fire Code of the Philippines.

Ti-aw nimo nang ka karaan sa atong mga firetrucks. Tinuod dunay mga bag-ong napalit nga mga fire trucks apan dili pa gyud kini igo.

Sa pikas bahin, dunay gipahigayon karon nga duha ka adlaw nga Fire Safety Kids Camp-out nga pagabuhaton sa Alta Village Garden Resort sa lungsod sa Cordova.

Ang maong activity pagasalmotan sa mga anak sa kabomberohan aron matudloan sa mga fire safety tips ug uban pang mahinungdanong butang aron makalikay sa sunog ug kun unsa ang buhaton kun dunay sunog nga mahitabo.

Ang maong duha ka adlaw nga programa gipangulohan sa among Regional Director SR. SUPT. MA LUSIA C HADJULA. Maayo nga sa bata pa atong mga anak kinahanglan nga aware na sila sa mga fire safety and prevention aron luwas ug makalikay sila sa sunog.