Color blind nga drayber angay mag-amping

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Daghan ang nag-ingon nga kun ang tanan nga mga drayber nga mag-amping lang sa ilang pagmaneho og sakyanan masiguro gayod nga kalikayan usab nga mahitabo ang mga aksidente sa kadalanan.

Matud pa nila nga mahimong wala’y kapuslanan ang kahanas sa drayber sa iyang pagmaneho og sakyanan kun kulang usab sa pag-amping kay kun dili maoy hinungdan sa pagbangga mao kini ang mabanggaan sa laing sakyanan.

Si Dr. Danilo Dionson nga nanag-iya og drug testing laboratory sa dalan Superior sa barangay Looc, dakbayan sa Mandaue maoy iyang gihimo sa iyang mga kliyente ang paghatag kanunay og tukma gayod nga mga pahimangno.

Gihimo niya ang pagpahimangno sa matag human sa pag-eksmin sa iyang mga kliyente diin iyang masuta ang mga depekto sa panan-aw sa mga mata niini.

Gipatin-aw niya nga nahimo na niyang paagi sa pag-eksamin sa iyang kliyente mao ang pagsuta sa kapasidad sa tinan-awan sa mga mata pinaagi sa pagpatan-aw sa nagkalainlain nga kolor.

Gipasabot niya nga sa maong pag-eksamin sa hingtungdan nga mga drayber maoy masuta kun unsang matang sa mga kolor nga hanap ang panan-aw ilabi na sa panahon sa kagabhion.

Dugang pa niya nga adunay drayber nga dili makaklaro sa pagtan-aw sa kolor nga yellow, green, orange ug uban pa sa panahon sa gabii nga kun dili makamatikod ang drayber sagad mao kini ang hinungdan sa aksidente.

Gitataw ni Dr. Dionson kun makasugat niining maong matang sa iyang kliyente maoy iyang himoon ang paghatag gayod og higpit nga pahimangno nga panahon sa gabii sa iyang pagmaneho og sakyanan kinahanglan gayod nga mag-amping sa iyang pagpadagan.

Ug ang maong pag-amping sa pagmaneho og sakyanan sa maong mga drayber mahimo lamang kini pinaagi sa pagpahinay lamang sa pagpadagan sa ilang mga sakyanan kay kun dili kini himoon ang mahitabo kon dili kini makabangga mao unya hinuon ang mabanggaan sa laing sakyanan.