BFP,Ayaw biyai ang giluto

Atong hisgotan ang nagkalainlaing hinungdan sa sunog nga gipangtubag sa atong kabomberohan dinhi sa Sugbo. Ang numero uno mao ang electrical misuse naglangkob kini sa overloading, octopus connection kon gakataykatay nga gipangsaksak nga plug ug uban pa nga pagpabaya nga may labot ang kuryente.

Nagsunod ang unattended cooking o ang pagpabaya o pagdanghag sa nagluto kay gibiyaan man kini o ba kaha nalimtan ang iyang giluto.

 Ug gisundan sa unattended lighted candle ug mga lamparilya nga wala mapalong sa dihang matulog na ug na sakdapan ug natumba kini.

Atong hisgutan ang unattended cooking nga usa sa kasagarang hinungdan sa sunog. Duna ko'y kasinatian niini ug mo angkon ko nga grabe akong pagdanghag. Niadtong petsa 8 sa Septiyembre 2012 naglata ko og karne gamit ang gas range.

Kay dugay man lagi malata ako lang gipahinayan ang kalayo apan anaa ra ko nagbantay. Unya kay lagi galata man ko nagkinahanglan kini og mga lamas ug mga utanon nga isagol. Kay wala man ko kakita sa predyider mipalit na lang ko.

Sa dihang nakalakaw nako aron pagpalit og utanon akong nahunahunaan nga duna diay ko'y importanteng lakwon.

Ug sa walay pagduhaduha milakaw ko sa akong importanteng tuyo nga wala ko maghunahuna nga duna ko'y gibiyaang giluto.

Human sa usa ka oras misantop sa akong utok ang gibiyaan nakong giluto ug gibati ko og grabeng kakulba ug dayong panawag sa balay ang nakaparat kay dili makontak ang among telepono ug bisan ang mga cellphone niini.

Haskang kulbaa nako ug daw wala ko mahimutang. Misamot akong kalisang nga dunay milabay nga firetruck sa akong tungod ug nakasiguro ko nga dunay alarma sa sunog ang girespondehan. Misamot ang akong kaguol ug kahadlok.

Tuod man nakontak ra gyud nako ang among balay ug gitubag ako sa akong anak. Nangutana ko og kumusta diha? Wala ba masunog? Misanong akong kinamanghorang anak nga wala daw kay iyang napawong ang gas range nga pwerte nang paiga sa karne ug pwerte na kuno ka buot sa aso.

Murag nahuwasan ko sa akong kalisang ug mapasalamaton nga napawong ra gyud intawon sa akong anak. Kay kun wala pa gyud to mabantayi pagkadakong demalas ug siguro ko nga ang headline sa mga mantalaan "Balay sa Bombero Nasunog!"

Ang leksyon nga atong makuha, kinahanglan dili gyud biyaan ang atong giluto. Paabuton gyud nga mahuman kita sa pagluto aron makalikay kita sa disgrasya.

Maayo na lang pud kay sakto sa training ang akong mga anak bisan tuod og mga bata pa kini sila makamao na kini unsa'y buhaton kun dunay sunog nga mahitabo ug kun unsaon paggamit ang fire extinguisher.

Salamat sa akong 8-year old daughter Vivienne Dorothy Villanueva sa imong kaisog ug pagkaalerto. Tinood bisan og bombero imong amahan dili kalikayan nga magdanghag kini usahay. Bitaw komedya ra.