Tubag sa katungdanan

Dayag kaayo sa publiko nga ang mga polis maoy ilang kaakohan ang pagpanalipod sa kinabuhi ug kabtangan sa mga tawo nga nagbayad og buhis ngadto sa goberno nga mao usab ang gikuhaan sa ilang suweldo sa matag bulan nga maoy gikuhaan sa matag adlaw nga panginahanglan sa ilang mga pamilya.

Dili lalim ang usa ka polis nga bisan gitugotan sila sa pagdala og armas apan higpit nga gidili ang pagkutlo og kinabuhi sa tawo nga naglakip na sa mga banggiitang kriminal gawas lamang kun gikinahanglan kini nilang gamiton kun anaa na sa kakuyaw ilang kinabuhi

Sa dili pa mopunting ang polis ngadto sa tawo nga nakahimo og krimen maoy unang himoon sa polis ang pagpasalba o pagpaboto sa gidala niining armas nga ang sumbohan adto ipuntariya sa ibabaw sa pagpasidaan sa maong kriminal nga dakponon.

Ang polis dili ordinaryo lamang nga kawani sa goberno nga nagsubay sa 8 oras nga pagtambong sa ilang trabaho tungod kay 24 oras man ilang trabaho. Matulog man ang polis sa panahon sa iyang off duty sa gihapon magpabilin iyang pagka polis ug mahimo kining pukawon bisan unsang orasa kun gikinahanglan iyang serbisyo.

Ang laing kalainan sa polis kun itandi sa ubang kawani sa goberno mao ang kompleto nilang pagsul-ob og uniporme panahon sa ilang pagtrabaho. Gawas sa gitakin nga armas, duna pay posas ug uban pa nga mga kahimanan sa panahon sa iyang pagtambong sa trabaho. Ug kun wala man ugaling kini magsul-ob sa iyang uniporme kay off duty apan sa gihapon nagpabilin iyang pagkapolis.

Ang nakapait sa trabaho nga polis kay bisan holiday, pasko, piyesta o mga dinagkong kalihokan sa katilingban ang mga polis alerto ug biyaan lamang ang ilang pamilya tungod sa “Tubag sa Katungdanan.” (Romeo T. Limpangog)