New Year's Call

Nagmalamposon ang gipahigayon nga New Year's Call sa Bureau of Fire Protection gahapon January 6, 2012 nga gipangulohan mismo sa among Regional Director SR. SUPT. MA LUISA C. HADJULA.

Gitambongan kini sa tanang regional staff, Provincial ug District Fire Marshals, City ug Municipal Fire Marshals lukop Central Visayas. Gihimo ang maong programa sa Apparatus floor sa Cebu City Fire Station.

Tipik sa mensahe ni SR. SUPT. HADJULA, iyang gipasalamatan ang tanang mga hepe sa atong kabomberohan nga misuporta sa tanan niyang mga programa ug lakip sa iyang nahisgotan ang mga accomplishments niya sa 2011.

Pipila sa mga mahinungdanong nahimo sa among director mao ang pag-activate og bag-ong mga fire stations sa Rehiyon 7 ug ang pagkombinsir sa mga local government units nga modonar sa ilang firetruck ngadto sa BFP-7 ug miabot kini og 23 ka trak.

Nahimong nagmalampuson ang tuig 2011 sa BFP 7 bisan pa sa mga ginagmay nga kakulian nga among nasugatan. In general, mas daghan ang mga positibong panghitabo ug mga butang nga nahimo kay sa mga bati ug dili maayo. Hinaut nga ang mga programa sa BFP-7 magpadayon aron mapalig-on o ba kaha mapanindot pa ang kalidad sa serbisyo ngadto sa publiko.

Sa pikas bahin, nagsugod na usab ang mga kalihokan alang sa labing grandyoso ug labing nindot nga festival lukop nasud nga mao ang Sinulog 2012. Gani matag gabii dunay mga pasundayag nga mahitabo diha sa Fuente Osmeña oval nga tipik ug kabahin sa maong dako nga kasaulogan.

 Pahimangno namo sa publiko nga sa inyong pagbiya sa inyong panimalay inyo unta nga masiguro nga ang tanang mga de-kuryente ninyo nga appliances na un-plug ninyo, ang LPG regulator na-off ug nasarado pagtarong ang mga pultahan.

Sa katapusan, hapsay ra ang atong pagsaulog ug pagsugat sa Bag-ong Tuig dinhi sa Sugbo. Gani akong nahibaw-an nga walay alarma sa sunog nga gitubag sa atong kabomberohan niadtong panahona.

Dili pareho sa kaulohan nga pwerte kadaghan ang sunog ang gitubag sa atong kabomberohan sa susamang panahon. Isip panapos, angayan lang siguro nga ato nang himoong batasan ang pagka fire safety conscious nga indibidwal niining pagsugod sa tuig ug hinaut nga magpadayon kini sa umaabot pa nga mga bulan.