Mga binuang

Apil ko nga mokampanya sa pagkuyanap sa illegal nga drugas, ilabi na ang shabu. Gani, dihang reporter pa ako kaniadto nga nadistino sa “police beat” kusog ko nga mo-expose sa binuang sa ubang polis nga nalambigit sa binuang kabahin sa isyu sa drugas.

Hisgutan nato kini dinhi sa atong lindog karong adlawa. Apan samtang mipaluyo ko sa kampanya batok sa gidili nga matang sa drugas, giisip nako nga kadtong rally sa miaging Biyernes nga gitawag nila og Movement Against Drugs (MAD) dili malampuson.

Ang mga nangapil sa maong kalihukan mga tinun-an gikan sa lainlaing tunghaan. Natural nga moapil sila kay gimandoan man sila sa ilang mga magtutudlo. Ayaw’g apil dili ba dili ka hatagan og maayong grado. Gusto nako nga mga ordinaryong tawo gikan sa kabarangayan, ilabi na kun gikan sa mga barangay nga giisip nga “drug-influenced barangays” maoy mangapil.

Unsa kining mga barangay? Timan-i ninyo. PDEA – Pasil, Dulho-Fatima, Ermita ug taga A. Lopez nga sakop sa barangay Calamba.

Ang Philippine Drug Enforcement Agency (PDEA) maoy ahensya nga gitugyanan sa paghimo’g paspas nga kampanya batok sa gidili nga matang sa drugas, apan sa akong obserbasyon – nagluya.

Ang ubang barangay nga daghang shabu mao ang Lorega-San Miguel, Kamagayan, Suba, Labangon, T. Padilla ug daghan pa kaayo.

Ang PDEA napakyas paghimo’g daghang kalampusan. Ingon sila nga dinagko ra kuno ang ila, ang mga gagmay kuno anha ra sa mga police stations. Pero hain man ang inyong dagko? Wala man sab lagi?

* * *

Buyno, ari kita sa giingon nako nga mga badlongong polis nga nabantayan nako nga mihimo’g bilyako nga kalihukan aron dili mabantayan. Ang uban sa maong mga polis nga kakonsabo sa mga tigpayuhot og drugas (shabu) aktibo usab nga manakop og mga pusher. Kini aron sa pagsalimbong sa ilang pagkatawo.

Apan ang report nga miabut kanako mao nga ang ilang gipangdakop mao ra usab ang pushers sa mga tigpayuhot og drugas nga kontra sa druglord nga ilang gisuportahan. Motoo mo dili?

* * *

Usa ka higala nako nga opisyal, usa siya sa gisaligan sa kampanya batok sa gidiling matang sa drugas. Miangkon siya nga dunay iyang mga kauban nga nadungog nga nalambigit sa binuang. Makapatoo tinuod nga sila nalambigit og binuang kay midaghan ang ilang mga katigayonan bisan og gagmay ra sila’g sweldo.

Sayonan ka kun kakonsabo nimo ang mga tigpayuhot og gidiling matang sa drugas? Sigurado nga kwartang malabo. Giingnan ko sa akong higala nga ipasil-ip ang uban sa iyang mga kauban kay bag-o pa sa serbisyo apan daghan na kaayo’g mga sakyanan.

He! He! He! Ingon ana man g’yud, dunay mga tawo nga langtaran kaayo nga mopasigarbo sa ilang kalampusan nga nakab-ot pinaagi sa binilyako nga paagi. Balikan nato ang kampanya sa illegal nga drugas, hagiton nako ang higala ko nga si Adrian Alvariño nga maoy regional direktor sa PDEA-Central Visayas.Paspasi ang paghimo’g kampanya Sir kay aron dili madudahan sa katawhan nga maayo lang mo sa “posing.”

Kun duna man gani’y dakup ang atong PDEA ug ang kapolisan, pastilan, ang ubang mga tigpatuman sa balaud adto na usab mohimo og inantigo nga buhat sa pag-prosecute sa kaso.

Usab-usabon nila ang ilang mga testimoniya sa korte aron nga makamugna og pagduda sa hukmanan. Resulta? Dismiss ang kaso tungod kay dili kombinsido ang huwes nga sad-an ang akusado. Paet!!!