Ang hakog ug ang hangol

(Una sa duha ka hugna)

Kagahapong adlawa nagretiro si Chief Justice Renato Puno dungan sa iyang ika 70 ka tuig nga adlaw’ng natawhan. Sigon sa atong Batakang Balaud ang edad nga 70 anyos mao ang mandatory retirement age sa mga miyembro sa hudikatura.

Kagahapong adlawa nagsugod usab sa iyang unang adlaw isip Chief Justice sa labing taas nga hukmanan sa nasud si Renato Corona human tudloa ni Pangulong Gloria Macapagal Arroyo pila lang ka adlaw sa wa pa ang nasudnong piniliay.

Ang nakaparat kay di siya ilhon ni Noynoy Aquino kinsa nagpaabot na lang nga iproklamar sa kongreso nga mananaug sa pagka pangulo sa miaging nasudnong piniliay. Isip bag-ong pangulo mas manumpa pa si Noynoy Aquino atubangan sa ilang barangay kapitan sa Barangay Central sa Tarlac City kay ni Chief Justice Renato Corona agi’g protesta sa pagtudlo ni Pangulong Arroyo og bag-ong Chief Justice bisan nasulod na kini sa election ban.

Kun iyang tinud-on pagpanumpa atubangan sa ilang barangay kapitan sa Tarlac City way problema si Noynoy tungod kay wa man siya did-i niini sa atong Batakang Balaud. Pero kun ang dili pag-ila ni Renato Corona isip bag-ong Chief Justice sa Korte Suprema ang iyang tinud-on, dako siya og problema niini tungod kay mosangpot kini ngadto sa usa ka Konstitusyonal Krisis.

Ang sistema sa atong gobyerno presidential ug sa nahisgutang sistema anaa ang gitawag nga separation of powers diin ang tulo ka sanga sa gobyerno sama sa ehekutibo, lehislatura ug hudikatura independente. Ubos ning maong sistema ang matag usa ka sanga di makapanghilabot sa ilang mga gahom gawas lang niadtong gitugot kanila sa Batakang Balaud sama sa pag-andam ug pagpalabang sa budget alang sa gastohonon sa pagpadagan sa kagamhanan diin gikinahanglan nga magtambayayong ang ehekutibo ug ang lehislatura.